सिन्धुपाल्चोक । भ्रष्टाचार अभियुक्त एवम् निलम्बित सांसद मोहन बस्नेतलाई गाउँसभाको प्रमुख अतिथि बनाएकोप्रति भोटेकोशी एमालेले आपत्ति जनाएको छ ।
सोमबार सम्पन्न भोटेकोशी गाउँपालिकाको गाउँसभामा विवादित नेता बस्नेतलाई प्रमुख अतिथि बनाइएको भन्दै एमालेले आपत्ति जनाएको हो ।
भोटेकोशी एमालेले सोमबार नै एक विज्ञप्ति जारी गर्दै बस्नेतलाई प्रमुख अतिथि बनाएकोमा आपत्ति जनाएको हो ।
एमाले भोटेकोशीकी अध्यक्ष सुन्तली लामा श्रेष्ठले विज्ञप्तिमार्फत त्यसप्रकारको गलत अभ्यासको भण्डाफोर गर्ने चेतावनी पनि दिएकी छिन् ।
‘समाजले नै बहिष्कार गर्नुपर्ने व्यक्तिलाई गाउँसभाको प्रमुख अतिथि बनाइनुले सुशासनको हाम्रो प्रयासमाथि पनि गम्भीर प्रहार भएको छ’, विज्ञप्तिमा भनिएको छ, ‘विवादित र भ्रष्टाचार अभियुक्त मात्रै होइन, कोही पनि नेतालाई गाउँसभाको प्रमुख अतिथि बनाइनु कानूनी राजमाथिकै उपहास हो । यस्तो कदमले गाउँसभालाई पार्टीको आमसभा जस्तो मात्रै बनाउँछ । यस प्रकारका गलत अभ्यासको हामी निरन्तर भण्डाफोर गरिरहनेछौं ।’
बस्नेत सन्धुपाल्चोककै बाह्रविसे नगरपालिकाको नगरसभामा पनि प्रमुख अतिथि भएका थिए ।
