काठमाडौं । अहिले जाताततै काठमाडौं महानगरका मेयर बालेन साहको हाइहाइ छ । मान्छेहरु भन्छन्– ‘मेयर होस् त काठमाडौंको बालेन जस्तो । बालेनलाई मेयर मात्रै होइन, देशको प्रधानमन्त्री नै बनाउनुपर्छ ।’ मान्छेहरुले यसो भनिरहँदा काठमाडौं महानगरकै स्थिति भने निकै दयनीय छ ।
महानगरभित्र यति भद्रगोल छ कि, त्यो भनिसाध्ये छैन । सहजै अनुमान गर्न सकिन्छ कि, महिनैपिच्छे बस्नुपर्ने कार्यपालिका बैठक आधा वर्षयता बस्न सकेको छैन । बैठक बस्न नसकेपछि महानगरले कुनै कार्यक्रम बनाउन सकेको छैन । कार्यक्रम नबनेपछि कुनै काम हुने कुरै भएन । त्यसैले बजेट खर्चको स्थिति पनि नाजुक छ । महानगरले गर्नैपर्ने काम गरेकै छैन ।
यतिसम्म कि, कर्मचारीलाई तलब खुवाउनसमेत महानगरलाई हम्मेहम्मे परेको थियो । जताबाट हेरे पनि महानगरमा भ्वाङैभ्वाङ छ । तर पनि मान्छेहरु ‘रहस्यमयी कथाका राजकुमार’लाई मन पराएजसरी मेयर बालेनको फ्यान भइरहेका छन् । यसैबीच मंगलबार प्रमुख प्रशासकीय अधिकृत सरोज गुरागाईंले नगर प्रहरी प्रमुख राजु पाण्डेलाई निलम्बन गरिदिए । यससँगै काठमाडौं महानगरभित्र मेयर साह पूर्णरूपमा एक्लिएका छन् ।
अहिलेसम्म मेयरलाई साथ दिइरहेको नगर प्रहरीसमेत बालेनको पकडबाट फुस्किएको छ । प्रशासकीय अधिकृत गुरागाईंले आफूलाई कार्यालय प्रवेशमा अवरोध गरेको घटनालाई लिएर एसएसपी पाण्डेलाई कारवाही गरेका हुन् । उक्त घटनाका विषयमा छानविन गर्न जाँचबुझ समिति समेत बनाइएको छ । बढीमा ६ महिनाका लागि पाण्डेलाई निलम्बनमा राख्दै गुरागाईंले नगरप्रहरीको तत्कालीन नेतृत्व एसपी विष्णु जोशीलाई दिएका छन् ।
अहिलेसम्म कर्मचारी र जनप्रतिनिधलाई विश्वासमा लिन नसकेका बालेनले नगरप्रहरीको आडमा महानगर चलाइरहेका थिए । आफैंले नगर प्रहरी प्रमुख बनाएको हुँदा राजु पाण्डेको बालेनलाई पूर्ण समर्थन र साथ थियो । कानूनतः नगर प्रहरीलाई प्रशासकीय अधिकृतले कमाण्ड गर्ने भए पनि पाण्डे सिधै बालेनको आदेशमा चल्ने गर्थे । बालेनकै निर्देशन बमोजिम गत चैत २१ मा प्रशासकीय अधिकृत गुरागाईंलाई कार्यालय आउन नदिन पाण्डेको नेतृत्वमा नगर प्रहरी परिचालित भएका थिए ।
तर, जनप्रतिनिधि र कर्मचारीले गुरागाईंलाई कार्यालय पुनःस्थापित गराइ छाडे । उक्त घटनापछि बालेनको प्रशासकीय अधिकृतसँग पानी बाराबारकै स्थिति छ । उपमेयर सुनीता डंगोलसँग पनि बालेनको सम्वन्ध बिग्रिएको छ । आपसी समन्वयमा महानगर चलाउनुपर्ने प्रमुख तीन व्यक्तिहरूबीच नै चरम अविश्वास र असमझदारी उत्पन्न भएपछि महानगरका महत्वपूर्ण काम कारवाहीहरू प्रभावित बनिरहेका छन् ।
काठमाडौंका वडाध्यक्षहरू पनि सबैजसो बालेनको विपक्षमा उनीहरूले बालेनको कार्यशैली अलोकतान्त्रिक, अपारदर्शी र मनोमानीपूर्ण रहेको भन्दै विरोध गर्दै आएका छन् । बालेनले जनप्रतिनिधि र कर्मचारीहरूलाई उपेक्षा गर्दै सचिवालयमार्फत महानगर चलाउन खोजेको आरोप छ ।
अब स्वभाविक प्रश्न उठ्छ– के बालेनले अब कांग्रेस एमालेले काम गर्न दिएनन् भनेर बसेको भरमा हुन्छ ? नेतृत्वले जनप्रतिनिधि र कर्मचारीलाई दोष थोपरेर पन्छने कि समस्याको समाधान निकाल्ने ? गरे आफूले गरेको हुने र गर्न नसके अरुले गर्न नदिएको भनेर कहिलेसम्म भाग्ने छुट हुन्छ । सफल नेतृत्व त्यो हो, जसले विषम परिस्थितिमा पनि गुणस्तरीय काम गर्न सक्छ । आफूमातहतका मान्छेलाई विश्वासमा लिनसक्छ । आफूबाहेक सबै गलत भन्ने मन्यताले कसलाई कहाँ पो पुर्याउला ?
