स्वर्णपत्रकर्मी श्यामराजालाई निर्देशक समाजको सम्मान

काठमाडौं । स्वर्णपत्रका ‘टेक्निकल डाइरेक्टर’ श्यामराजा श्रेष्ठ सम्मानित भएका छन् । नेपाल चलचित्र निर्देशक समाजको रजत जयन्तीको अवसरलाई श्रेष्ठलाई सम्मान गरिएको हो ।

नेपाली चलचित्र निर्देशनको क्षेत्रमा दुई दशक योगदान पुर्याएबापत समाजले श्रेष्ठलाई सम्मान गरेको हो । शुक्रबार चलचित्र विकास बोर्डमा आयोजित एक भव्य समारोहबीच वनमन्त्री प्रेमबहादुर सिंहले श्रेष्ठलाई सम्मानपत्र प्रदान गरेका हुन् ।

२०५७ सालमा क्लासिक सिने युनिभर्समा प्रताप सुब्बाबाट प्रशिक्षण लिएसँगै सुरु भएको श्रेष्ठको कलायात्राले निकै आरोह–अवरोहको सामना गरेको छ । अभिनय सिक्न प्रशिक्षण लिन गएका श्रेष्ठलाई सुब्बाले निर्देशनतिर लाग्न प्रेरणा दिएका थिए ।

दुई वर्ष निर्देशनको कोर्ष गरेर उनी निदेर्शनतिर अघि बढेका थिए । ‘वचन’ नामक टेलिसिरियलबाट निर्देशन यात्रा सुरु गरेका श्रेष्ठले सुब्बासँगै दार्जलिङ र सिक्किमका दुई ठूला प्रोजेक्टमा काम गर्ने मौका पाए । र त्यसपछि उनी निरन्तर टेली चलचित्र, चलचित्र, वृत्तचित्रलगायतको निर्देशनमा व्यस्त छन् ।