वाल्मीकिमा माओवादी आतंक, विद्यार्थीमाथि निर्घात कुटपिट

काठमाडौं । काठमाडौंको प्रदर्शनी मार्गस्थित वाल्मीकि विद्यापीठमा माओवादीनिकट अखिल क्रान्तिकारीका कार्यकर्ताले स्वतन्त्र विद्यार्थी प्रेम तिमल्सिनामाथि निर्घात कुटपिट गरेका छन् ।

स्ववियु निर्वाचनलाई लक्षित गरी क्रान्तिकारीले लगाएको ताला स्वतन्त्र विद्यार्थी प्रेम तिमल्सिनाले फोडेपछि माओवादीनिकट अखिल क्रान्तिकारीका कार्यकर्ताले उनलाई निर्घात कुटपिट गरेका हुन् ।

तिमल्सिनाले पठनपाठन प्रभावित भएको भन्दै पटक पटक अखिल क्रान्तिकारीका नेताहरुसंग संवाद गरिरहेका थिए । विश्वविद्यालयले पनि पटक पटक गरेको वार्ता असफल भएपछि स्वतन्त्र विद्यार्थीहरुको समुहले ताला फोडेका हुन् ।

तिमल्सिनालाई अखिल क्रान्तिकारीका कार्यकर्ताहरुले घेरेर हेलमेट प्रहार गरेका थिए । तिमल्सिनाको मुखमा र टाउकोमा चोट लागेको प्रत्यक्षदर्शीले बताएका छन् । तिमल्सिनालाई अहिले अस्पताल पुर्याइएको प्रत्यक्षदर्शीले बताए ।