सिन्धुपाल्चोक । सिन्धुपाल्चोकको हेलम्बु गाउँपालिकामा शनिबार भएको ‘निःशुल्क आयुर्वेद स्वास्थ्य शिविर’बाट करिब २ सय २० स्थानीयवासीले सेवा लिएका गाउँपालिकाले जनाएको छ ।
हेलम्बु गाउँपालिकाको सहयोग तथा धन्वन्तरी आयुर्विज्ञान संस्थान, अन्नपूर्ण टाइम्स र मदन भण्डारी मेमोरियल कलेजको संयुक्त आयोजनामा भएको शिविरको उद्घाटन शनिबार गाउँपालिका अध्यक्ष निमा ग्याल्जेन ह्योल्मो र वडा नम्बर ७ का अध्यक्ष निलबहादुर खड्काले आफ्नो स्वास्थ जाँचसँगै गरेका थिए ।
हेलम्बु–७, महाङ्कालस्थित स्वास्थ्य चौकीमा भएको शिविरका लागि काठमाडौंबाट एक विशेषज्ञ एमडीसहित १० बीएएमएस डाक्टर, एक फिजियोथेरापिस्ट र एक डाक्टर जिल्ला आयुर्वेद तथा वैकल्पिक चिकित्सालयबाट पुगेका थिए । कार्यक्रम संयोजक डा. सुष्मा साउदका अनुसार, शिविरमा सामान्य स्वास्थ्य जाँचदेखि विभिन्न रोग, जस्तै हाडजोर्नी, नशा, पेटसम्बन्धी समस्या, ग्यास्ट्रिक, पायल्स, फिसर, फिस्टुला, महिनावारी गडबडीसहित विभिन्न रोगको परीक्षण तथा परामर्श प्रदान गरिएको थियो ।
उपचारका लागि आउने धेरैजसो बिरामी हाडजोर्नी र नशाको समस्या लिएर आएका उनले बताइन् । शिविरमा खानपान, जीवनशैली, योग र आरोग्यबारे जनचेतनामूलक सन्देशहरू पनि प्रवाह गरिएको थियो । वडाध्यक्ष निलबहादुर खड्काले स्वास्थ्य शिविरबाट २ सय २० जनाले सेवा लिएको जानकारी दिए ।
