सिन्धुपाल्चाेक । बाह्रविसे– ७ घुम्थाङका पुण्यबहादुर गुरुङले करिब एक दशक त्रिपालमुनि रात कटाए । बृद्ध वयका गुरुङ दम्पतीले भदौरे भेलसँगै पुस–माघको जाडो पनि त्रिपालमुनिनै कठ्याङ्ग्रिएर बिताए ।
लामो समय भारत बसेर २०७२ सालको विनाशकारी भूकम्पपछि जन्मथलो सम्झेर गाउँ फर्किएका पुण्यबहादुर अब घरविहीन छैनन् । किनकि, उनलाई नेकपा एमालेको बाह्रविसे नगर कमिटीअन्तर्गतको घुम्थाङ गाउँ कमिटीले पक्की घर बनाइदिएको छ । गाउँ कमिटीको पहलमा बनेको उक्त घरलाई शुक्रबार एक समारोहबीच पुण्यबहादुरलाई हस्तान्तरण गरिएको छ ।
नेकपा एमाले बागमती प्रदेश कमिटी सदस्य एवम् बाह्रविसे नगरपालिकाका पूर्वमेयर निमफुञ्जो शेर्पाबाट नवनिर्मित घरको चावी पाउँदै गर्दा पुण्यबहादुरको मुहारमा छाएको खुसी अवर्णनीय थियो । यसरी दुखीपीडित जनताको पक्षमा काम गर्न पाउँदा आफूलाई खुसी लागेको बताउँदै नेता शेर्पाले आगामी दिनमा पनि यस्ता सत्कर्म गर्दै जाने प्रतिबद्धता व्यक्त गरेका छन् । उनले अहिलेको नगरपालिकाको नेतृत्वले जनताको पक्षमा काम नगरेको पनि बताए ।
पुण्यबहादुरलाई घरसँगै सिरक, डसना पनि प्रदान गरिएको नेकपा एमालेका स्थानीय युवा नेता सुप्पा श्रेष्ठले जानकारी दिए ।
कार्यक्रममा एमालेका जिल्ला नेताहरु आङदोर्जे शेर्पा, सागर घिमिरेलगायतको उपस्थिति थियो । उपस्थित सबै नेताले दुखी–पीडित जनताको साथमा सधैं एमाले रहेको बताए । यससँगै बाह्रविसे एमालेले यस्ता थुप्रै जनमुखी काम गर्दै आएको छ ।
