दशैमा मात्र साढेँ पाँच लाखले लिए हवाईसेवा,आन्तरिकतर्फ मात्र पौने तीन लाख

काठमाडौं । यसवर्षको दशैमा मात्र आन्तरिकतर्फ दुई लाख ७४ हजार ५७७ जनाले यात्रा गरेका छन्। जसमा आन्तरिक मात्र पाँच हजार १०८ वटा उडान र अवतरण भए ।

दशैँअघि संघीय राजधानी काठमाडौँलाई देशका विभिन्न भागसँग जोड्ने राजमार्ग र सहायक राजमार्गहरुमा पहिरो गयो । सडकबाट आवागमन बिथोलिएपछि त्यसको प्रभाव हवाइसेवामा पर्‍यो र दशैँकै समयमा सडक अवरोध हुँदा हवाई यात्रुको चाप बढेको हो । असोज १३ गतेदेखि २६ गतेसम्म १६ दिनभित्र आन्तरिक र अन्त्तराष्ट्रिय गरी कुल ६ हजार ८५२ उडान र अवतरण भएका छन् ।

भीषण वर्षाका कारण असोज ११ र १२ गते काठमाडौँबाट कुनै उडान हुन सकेन । यस अवधिमा आन्तरिकतर्फ त्रिभुवन अन्तर्राष्ट्रिय विमानस्थलमा दैनिक औसत १७ हजार १६१ यात्रुको आवागमन भयो । सबभन्दा बढी असोज १४ गते १९ हजार १५६ यात्रुले आन्तरिक उडानको सेवा लिएका थिए ।

१३ गते अर्थात् दशैँ शुरू हुनु चार दिन अगाडिदेखि त्रिभुवन अन्तर्राष्ट्रिय विमानस्थलको आन्तरिक टर्मिनलमा यात्रुको भिड लागेको थियो । त्यसयता १६ दिनमा त्रिभुवन अन्तर्राष्ट्रिय विमानस्थल भएर पाँच लाख ३८ हजार ५८२ जनाले हवाई यात्रा गरेका छन् ।