काठमाडौं । नेकपा एमालेको सबैभन्दा शक्तिशाली र प्रभावशाली मानिने भ्रातृ संगठन युवा संघ नेपाल महाधिवेशनको संघारमा छ । जेठ ९ गतेदेखि ११ गतेसम्म पोखरामा हुने दशौं महाधिवेशनबाट चुनिने नेतृत्वप्रति अहिले धेरैको चासो छ ।
करिब दुई हजार प्रतिनिधि सहभागी हुने महाधिवेशनले अध्यक्षसहित नौजना पदाधिकारी चुन्नेछन् । अधिवेशनबाट अध्यक्षको दौडमा अहिलेका अध्यक्ष क्षितिज थेवेदेखि अहिलेका महासचिव सुमन पुरीसम्म छन् । थेवेले भने सर्वसम्मत भएमात्रै आफू अध्यक्षमा दोहोरिने बताइरहेका छन् ।
त्यस्तै, दोलखाका महाराज गुरुङ, अहिलेका प्रवक्ता कृष्णहरि केसी र प्रकाश गौतमले पनि अध्यक्षका लागि दौडधुप गरिरहेका छन् । बुझिएअनुसार अन्तिममा थेवेले गुरुङलाई समर्थन गर्ने र गुरुङनै अध्यक्ष हुने सम्भावना प्रबल छ । त्यस्तै महासचिवमा सिन्धुपाल्चोकका महेश चौलागाईं, अहिलेका सचिव निरोज पौडेल, कुबेर अधिकारी, विनय शाह, खेम शर्मा र पर्वत भण्डारीले आकांक्षा व्यक्त गरेका छन् ।
यीमध्ये सिन्धुपाल्चोकका चौलागाईंको सम्भावना धेरै रहेको चर्चा छ ।
