रुपन्देही अदालतमा रविविरुद्ध छुट्टै मुद्दा दर्ता हुने

काठमाडौं । रास्वपा सभापति एवम् पूर्वगृहमन्त्री रवि लामिछानेविरुद्ध रुपन्देही जिल्ला अदालतमा पनि छुट्टै मुद्दा दर्ता हुने भएको छ । कास्की प्रहरीको हिरासतमा रहेका लामिछानेलाई मंगलबार बयानका लागि रुपन्देही लगिएको छ । र, त्यहाँ उनको बयान लिन सुरु गरिएको छ ।

गोर्खा मिडिया नेटवर्क प्रालिका पूर्वप्रबन्ध निर्देशक लामिछानेमाथि सहकारीको बचत अपचलन र संगठित अपराधको कसुरमा अनुसन्धान गर्न भैरहवा ल्याइएको हो । बुटवलको सुप्रिम बचत तथा ऋण सहकारीबाट लामिछानेले ऋण लिएको देखिएको छ । २ करोड ऋणमध्ये संस्थाबाट सेवा शुल्क कटाएर १ करोड ९६ लाख रुपैयाँ गोर्खा मिडियामा लगिएको थियो ।

कास्की प्रहरीको हिरासतबाट भैरहवा ल्याइएका कुमार रम्तेल र शिवबहादुर गुरुङलाई भने बयान गराएर मंगलबार काठमाडौं पठाइएको छ । लामिछानेलाई पनि भैरहवामा बयान सकिएपछि काठमाडौंको स्वर्णलक्ष्मी सहकारीको रकम अपचलनमा अनुसन्धान गर्न राजधानी लैजाने तयारी छ ।