काठमाडौं । ज्यान मार्ने उद्योगमा सर्वोच्च अदालतबाट दोषी ठहर भएपछि राजीव गुरूङ अर्थात् दीपक मनाङेको सांसद पद के हुन्छ र उनी कति वर्ष जेल बस्नुपर्छ भन्ने प्रश्न उठेको छ । मनाङेलाई २०६९ सालमा तत्कालीन पुनरावेदन अदालत पाटनले ज्यान मार्ने उद्योगमा पाँच वर्ष कैद सजाय सुनाएको थियो ।
मनाङेलाई चक्रे मिलनमाथि आक्रमण गरेको अभियोगमा सजाय सुनाइएको थियो । सर्वोच्चका न्यायाधीशद्वय नहकुल सुवेदी र टेकप्रसाद ढुंगानाको संयुक्त इजलासले पनि पुनरावेदन अदालतको फैसला सदर गरेपछि मनाङे दोषी ठहर भएका हुन् । उनी पहिले केही समय जेल बसेर छुटेका थिए । अब उनी कति समय जेल बस्नुपर्छ भन्ने चाहिँ स्पष्ट हुन सकेको छैन ।
हाल सर्वोच्चको फैसला मात्र आएको, लिखित संक्षिप्त आदेश पनि नआएकाले उनको सांसद पद के हुन्छ र जेल अवधि के कति हो भन्नेबारे अहिले यकिनसाथ भन्न नसकिने बताइएको हो । संविधान अनुसार मनाङेको सांसद पद रिक्त रहने कि नरहने भन्ने फैसलाको पूर्णपाठ आएपछि मात्रै थाहा हुने कानुनविदहरु बताउँछन् ।
प्रदेश सांसद कुनै अभियोगमा पक्राउ परे वा अभियोग ठहर भएमा कैद भुक्तानीको अवधिभर निलम्बित हुने र उसको पारिश्रमिक, सेवा सुविधा मात्र रोक्का हुने प्रदेश सभा नियमावलीमा उल्लेख छ ।
