विद्युतीय सवारीसाधनप्रति उपभोक्ताको लोभलाग्दो आकर्षण, नेपाल भित्रिने नयाँ गाडीमध्ये ७१ प्रतिशत ईभी

काठमाडौं । पछिल्लो समय नेपाली उपभोक्ताको विद्युतीय सवारीसाधनप्रति लोभलाग्दो ढंगमा आकर्षण बढिरहेको छ । तथांकअनुसार पछिल्ला तीन वर्षमा विद्युतीय गाडी ईभीको आयात ह्वात्तै छ । जसले ईभीप्रति नेपाली उपभोक्ताको आकर्षणलाई पुष्टि गर्छ ।

चालु आर्थिक वर्ष २०८१–८२ को पुस मसान्तसम्मको अर्थात् ६ महिनामा कुल ८ हजार ५९ वटा साना सवारी साधन आयात भएकोमा ५ हजार ६९६ वटा ईभी मात्र छन्। यो कुल साना गाडी आयातको ७१ प्रतिशत हो।

यसबीचमा आयात भएका पेट्रोलियम इन्धनबाट चल्ने गाडी २९ प्रतिशत अर्थात् २ हजार ३६३ मात्र छन्। गत आर्थिक वर्षको तुलनामा हलुका सवारी साधन आयातमा पेट्रोलियम इन्धनबाट चल्ने गाडीको संख्या उल्लेख्य घटेको छ।

अनि विद्युतीय गाडीको आयात बढेको छ। भन्सार विभागको तथ्यांकअनुसार २०८०–८१ को साउनदेखि पुससम्म ६ महिनाको अवधिमा ७ हजार ८०१ हलुका सवारी आयात हुँदा ६५ प्रतिशत अर्थात् ५ हजार ५१ ईभी गाडी भित्रिएका थिए भने पेट्रोलियम इन्धनबाट चल्ने गाडी ३५ प्रतिशत अर्थात् २ हजार ७५० मात्रै भित्रिएका थिए।