काठमाडौं । दोलखाको बिगुमा बन्न लागेको ४२ मेगावाट क्षमताको लप्चे तामाकोशी जलविद्युत अयोजनाको वित्तीय व्यवस्थापन सम्झौता सम्पन्न भएको छ ।
आइतबार काठमाडौंमा आयोजित एक विशेष समारोहबीच आयोजना र बैंकहरुबीच वित्तीय व्यवस्थापन सम्झौता सम्पन्न भएको हो । ७ अर्ब लगानीमा निर्माण हुने आयोजनाका लागि एनएमबि बैंक, नबिल बैंक, नेपाल इन्फ्रास्ट्रक्चर बैंक, एभरेष्ट बैंक र डायनामिक हाइड्रो ईनर्जी प्रालिबीच ऋण लगानी गर्न वित्तीय व्यवस्थापन सम्झौता भएको हो ।
आयोजनामा बैंक तथा वित्तीय संस्थाहरुले ५ अर्ब २५ करोड रुपैयाँ ऋण लगानी गर्ने भएका छन् । साथै एनएमबि बैंकले एकल लगानीमा चेपे खोला क्यास्केड जलविद्युत आयोजना (२ मेगावाट) को पनि वित्तीय व्यवस्थापन समापन गरेको छ ।
२ मेगावाट क्षमता रहेको चेपे खोला क्यास्केड जलविद्युत आयोजनाको अनुमानित लागत ४३ करोड ४० लाख रहेको छ भने एनएमबि बैंकले ३४ करोड ऋण लगानी गर्ने भएको छ । एनएमबि बैंकका चिफ, सस्टेनेबल ईनर्जी बैंकिङ्ग दिनेश दुलाल तथा डायनामिक हाइड्रो ईनर्जी प्रालिको तर्फबाट अध्यक्ष मोहन बिक्रम कार्कीले ऋण सम्झौता पत्रमा हस्ताक्षर गरेका हुन् । एनएमबि बैंकका प्रमुख कार्यकारी अधिकृत गोविन्द घिमिरे तथा कम्पनीको तर्फबाट अध्यक्ष कार्कीले ऋण सम्झौता पत्र आदान प्रदान गरेका छन् ।
कार्कीले एनएमबि बैंकसँग योसहित ८ वटा परियोजनाको लागि ऋण उपभोग गरिरहेको तथा यस परियोजना निर्धारित लागत तथा समयसिमामा सम्पन्न गर्ने प्रतिवद्धता जाहेर गरेका छन् ।
