काठमाडौं । एक युवकले आफूलाई लत लागेको भन्दै विभिन्न सामाजिक सञ्जालविरुद्ध मुद्दा हालेका छन् । समाचारअनुसार क्यानडाका २४ वर्षीय एक युवकले टिकटक, फेसबुक, इन्स्टाग्राम, युट्युब, रेडिट लगायतका सामाजिक सञ्जाल विरुद्ध मुद्दा दायर गरेका हुन् ।
उनले सामाजिक सञ्जालका विभिन्न माध्यमले आफूलाई लत लगाएको दाबी गर्दै मुद्दा दायर गरेका हुन् । सन् २०१५ देखि निरन्तर सामाजिक सञ्जाल प्रयोग गर्दा शारीरिक रूपमा पनि असर परेको उनको भनाइ छ ।
सामाजिक सञ्जाल प्लेटफर्म दैनिक कति प्रयोग गर्ने भन्ने सीमितता कायम नभएकाले पनि त्यसको प्रयोगले स्वास्थ्यमा नकारात्मक असर पारेको उनको आरोप छ ।
खासगरी सामाजिक सञ्जालको अत्यधिक प्रयोगले निन्द्रा बिग्रिएको र व्यक्तिको रचनात्मक क्षमतामा ह्रास ल्याएको उक्त मुद्दामा उल्लेख छ । अन्तर्राष्ट्रिय सञ्चारमाध्यमका अनुसार पछिल्लो समय क्यानडामा सामाजिक सञ्जालविरुद्ध मुद्दा हाल्ने प्रवृत्ति बढ्दो छ ।
