काठमाडाैं । भ्रष्टाचार अभियुक्त कांग्रेस नेता, निलम्बित सांसद एवम् पूर्वमन्त्री मोहनबहादुर बस्नेतको ‘काजी शैली’सामू सिन्धुपाल्चोकको नेकपा एमाले र माओवादी केन्द्र निरीह बनेको छ ।
अख्तियारले भ्रष्टाचारी ठहर गर्दै मुद्दा दर्ता गरेका बस्नेतले दिनहुँजसो जिल्लामा आएर विभिन्न आयोजनाहरु उद्घाटन गरिरहेका छन् । सोमबार लिसङ्खुपाखरमा धुमधामसँग खानेपानी आयोजना उद्घाटन गरेका बस्नेतले मंगलबार सुनकोशीको ठोकर्पामा स्वास्थ्यचौकी उद्घाटन गरेका छन् । बस्नेतलाई ठोकर्पामा पञ्जेबाजासहित स्वागत गरिएको थियो ।
स्मरणीय छ कि, यसअघि सुनकोशी गाउँपालिकासँगै नेकपा एमाले र माओवादी केन्द्रको गाउँ कमिटीले यो कार्यक्रम नगर्न विज्ञप्ति जारी गरेका थिए । उनीहरुले जबरजस्त कार्यक्रम गरे प्रतिकार गर्ने चेतावनी पनि दिएका थिए । तर, उनीहरुको चेतावनीलाई बेवास्ता गर्दै बस्नेतले भव्यसँग स्वास्थ्यचौकी उद्घाटन गरे ।
यसले सिन्धुपाल्चोकमा बस्नेतको ‘काजी शैली’प्रति एमाले र माओवादी निरीह भएको प्रष्ट पार्छ । यसरी बस्नेतसामू एमाले र माओवादी कमजोर देखिँदा एमालेबाट कांग्रेसका गएका नेता केदार क्षेत्री निकै मख्ख देखिन्थे । एमाले नेता सरेश नेपालसँगको इगोका कारण कांग्रेस छिरेका क्षेत्री भ्रष्टाचार अभियुक्त बस्नेतको पछि लाग्दा पनि गर्व अनुभूत गरिरहेका छन् ।
र, उनले मंगलबार ठोकर्पाको कार्यक्रममा भनेका छन्– कांग्रेस प्रवेश गर्न १० वर्ष ढिला गरेछु । नत्र अहिलेसम्म धेरै विकास गर्नसक्ने रहेछु ।
