१२ दिन नगरकोट बसेर निर्मलनिवास फर्किए ज्ञानेन्द्र शाह

काठमाडौं । पूर्वराजा ज्ञानेन्द्र शाह नगरकोटमा बसेर नेपालमा राजसंस्था फर्काउने रणनीति बनाइरहेका छन् । र, उनले राजनीतिक भेटघाटलाई पनि तीव्रता दिएका छन् ।

विशेषगरी राजसंस्था पुनस्र्थापनाको एजेन्डा बोकेका राप्रपा र राप्रपा नेपालका नेताहरूसँग पूर्वराजाले पछिल्लो समय बाक्लो भेटघाट गरेका हुन् । उनी नगरकोट क्षेत्रमा १२ दिन बसेर शुक्रबार निर्मल निवास फर्केका छन् ।

यसबीचमा नवराज सुवेदी नेतृत्वको ‘संयुक्त जनआन्दोलन समिति’ ले जेठ १५ गतेदेखि ‘जनआन्दोलन’ घोषणा गरेको छ । तीनकुने विध्वंशको ठीक एक महिना अर्थात् वैशाख १५ गतेदेखि झन्डै दुई साता नगरकोट बसेर पूर्वराजा शाहले राजावादी समर्थक विभिन्न व्यक्तिहरूसँग भेटघाट र छलफल गरेका हुन् ।

पूर्वराजा ज्ञानेन्द्र सात जना परिवारका सदस्य र आफ्नो सुरक्षामा खटिएका टोलीसहित नगरकोटमा बसेका थिए ।