सिन्धुपाल्चोक । सिन्धुपाल्चाेककाे भोटेकोशी गाउँपालिका-४ हिन्दीमा निर्माणाधीन ४० मेगावाटको भोटेकोशी-१ जलविद्युत् आयोजनाको डिसेन्डर कभर स्ल्याबमा फसेर बेपत्ता भएका २ मजदुरको १३ घण्टापछि शव फेला परेको छ ।
शुक्रबार १ बजेर २५ मिनेट जाँदा घटना भएलगत्तै उद्धारकार्य थालिए पनि बिहान चार बजे मात्रै मृत अवस्थामा उनीहरुलाई भेट्टाइएको हो । आयोजनाको डिसेन्डर कभर स्ल्याबमा च्यापिएर ज्यान गुमाउनेमा बर्दिया नगरपालिका रामजिन थारु र सुमन थारु छन् । उनीहरुको शव पोस्टमार्टमका लागि काभ्रेस्थित धुलिखेल अस्पताल पठाइएको छ । ढलानको संरचनाभन्दा तल्लो भागमा उनीहरू फसेकाले निकाल्न अप्ठ्यारो भएको थियो ।
जिल्ला प्रहरी सिन्धुपाल्चोकको तथ्यांकअनुसार दुर्घटनामा ११ जना घाइते भएका छन् । वर्ष दिनअघिबाट निर्माण सुरु गरिएको भोटेकोशी-१ जलविद्युत्को सुरुङभन्दा माथि शुक्रबार मजदुर काम धमाधम गर्दै थिए । एक्कासी स्ल्याब भत्किन थालेपछि तल बसेर काम गरिरहेका कामदार च्यापिएर चिच्याउन थालेका थिए । भागदौडमा १३ जना स्ल्याब र माथिल्लो भागको बीचमा फसेका थिए ।
घाइते हुनेमा दोलखाका रामचन्द्र रिमाल, साइला थामी, गोपाल थामी, पदम थामी, विजय थामी, विशाल थामी, बर्दियाका दुर्गा थारु, रोल्पाका साशन थापा, इलामका शाकबहादुर श्रेष्ठ छन् । बर्दियाका लाहनु थारुको अवस्था गम्भीर भएको स्वास्थ्यकर्मीले बताएका छन् ।
