जुगलको कुनेगाँउको पहिरोपरि २ जनाको मृत्यु २ बेपत्ता

काठमाडौं । अविरल वर्षातका कारण शनिबार आएको पहिरोले बगाँउदा जुगल गाँउपालिकाको कुनेगाउँमा दुईको ज्यान गएको छ भने दुई अझै बेपत्ता छन्  ।

इलाका प्रहरी जलविरेका प्रहरीका अनुसार पहिरोले क्षतिग्रस्त घरबाट जुगलको कुनेगाँउबासी ४५ वर्षका चित्रबहादुर मिजार र एक पहिचान नखुलेको ५ वर्षे बालकको शव निकालिएको छ ।

बेपत्ता हुनेमा मृतक मिजारकी श्रीमती ४५ वर्षकी ठूलोकान्छी र जुगल ४ का २४ वर्षका अविनाश नेपाली हुन् । बेपत्ता अविनाश ठूलीकान्छीको बहिनीको छोरा भएको खुलेको छ। जुगल गाउँपालिकाका अनुसार मृतक मिजारको घरमा अविनाश र उनका छोरा केही दिनअघि पाहुना बनेर आएको बताए । शनिबार एक्कासी कुने गाँउको माथिल्लो भाग भास्सिएर पहिरो लागेपछि स्थानीयबिच भागाभाग चलेको थियोे ।

मिजारको घर पुरै ध्वस्त भएसँगै वरिपरि केही घरमा सामान्य क्षति पुर्‍याएको छ । अहिले वरीपरीका सबैलाई सुरक्षित स्थानमा सारिएको छ ।