काठमाडौं । सिमलतालमा पहिरोले ४८ यात्रुसहित दुईवटा बस बगाएको तीन साता पुग्न लागिसक्यो, तर अझै उक्त बस भेटिएको छैन । र बसमा सवार यात्रुहरुको पनि पत्तो लागेको छैन ।
तथ्यांकअनुसार पृथ्वी राजमार्गको मुग्लिन–मौवाखोला सडकखण्डमा मात्रै बितेका आठ वर्षमा २१ वटा सवारीसाधन र ५५ यात्रु त्रिशूली नदीमा खसेर बेपत्ता भएका छन् ।
जिल्ला ट्राफिक प्रहरी कार्यालय चितवनका अनुसार आर्थिक वर्ष २०७३/७४ मा पाँचवटा, २०७४/७५ मा चारवटा र २०७५/७६ मा चारवटा सवारीसाधन बेपत्ता भएका हुन् ।
त्यस्तै आर्थिक वर्ष २०७६/७७ मा एउटा, २०७७/७८ मा एउटा, २०७९/८० मा एउटा र २०८०/८१ मा पाँचवटा सवारीसाधन बेपत्ता भएका हुन् । बेपत्ता भएका सवारीसाधनमध्येबाट आर्थिक वर्ष २०७३/७४ मा १४, २०७८/७९ मा चार र २०८०/८१ मा ३७ जना यात्रु बेपत्ता भएका हुन् ।
