काठमाडौं । अहिले राजनीतिक वृत्तमा काठमाडौं महानगरका मेयर बालेन साहले नयाँ दल खोल्ने कुरा निकै चर्चामा छ । हुनतः बालेनले दल खोल्ने चर्चा नयाँ होइन । तर, पछिल्लो राजनीतिक घटनाक्रमसँगै बालेनले दल खोल्ने कुराले धेरैको ध्यान खिचेको छ ।
जेन जी आन्दोलनकै बलमा बनेको अहिलेको अन्तरिम सरकारले फागुन २१ गते संसदको चुनाव गर्ने भनेको छ । फागुनमा चुनाव गर्ने कुरा आफैंमा निकै चुनौतीपूर्ण छ । यतिसम्म कि, चुनावअघि नै पुरानै प्रतिनिधिसभा पुनःस्थापना हुने सम्भावना पनि कमजोर छैन । तर, जे होस् अब राजनीतिक दलहरु चुनाव हुन्छ भनेर नै मैदानमा होमिनुपर्ने अवस्थामा छन् ।
अहिलेकै अवस्थामा चुनाव हुँदा पुराना दललाई खुलेर मैदानमा उत्रन समेत सकस हुने अवस्था छ । नयाँ भनिएको रास्वपा पनि आफैंभित्रको किचलो र गल्तीमाथि गल्तीले थिचिएर थिलथिलो भएको छ । यसैबीच बालेनको नयाँ दल दर्ताको हल्लाले बजार पिटेको हो । बालेनले खोल्ने भनिएको नयाँ दल प्रजातान्त्रिक मूल्य मान्यता राख्ने खालको हुने बुझिएको छ ।
र, अहिले उक्त पार्टीको नेतृत्व पनि बालेनले नगरेर अरु कसैले गर्ने सम्भावना प्रबल छ । बुझिएअनुसार अझै पनि बालेन फ्रन्टलाइनमा नआएर अर्थात पर्दाभित्रै बसेर खेल खेल्ने मुडमा देखिन्छन् । दलको नेतृत्वको नगरे पनि उनले त्यहीं दलबाट चुनाव लड्ने सम्भावना छ । तर, त्यतिबेला प्रत्यक्ष कार्यकारीका लागि चुनाव हुने होइन ।
सांसद जितेर प्रधानमन्त्री हुने खेल खेल्नुपर्ने हुँदा बालेन त्यो खेलबाट पन्छने सम्भावना पनि छ । अहिले नै अध्यादेशबाट प्रत्यक्ष कार्यकारी प्रधानमन्त्रीका लागि चुनाव लड्ने चाहना भए पनि त्यो सम्भावना एकदमै कम रहेको बालेनले बुझेका छन् । र, अहिले बालेनले दल गठननै गर्दा उनको टिममा समेटिने मान्छेहरुको सूची पनि बढ्दै गएको छ ।
बुझिएअनुसार बालेनको पार्टीमा रास्वपा छाडेकी सुमना श्रेष्ठ, अहिलेका गृहमन्त्री ओमप्रकाश अर्याल, ऊर्जामन्त्री कुलमान घिसिङ, रास्वपाका पूर्वनेता एवम् बैंकर अनिलकेशरी साहलगायत सहभागी हुनेछन् । यसरी बालेनले अहिलेकै अवस्थामा दल खोलेर चुनावमा होमिए भने रास्वपालाई समेत निकै कठिन पर्ने देखिन्छ भने पुराना दल कुन हालतमा पुग्ने हुन् भनेर अनुमान गर्नसमेत कठिन छ ।
