यसरी हुनेरहेछ अध्यागमनमा भिजिट भिसाको सेटिङ

काठमाडौं । भिजिट भिसाका नाममा मानव तस्करी हुने गरेकोबारे तीन महिनाअघि नै उजुरी परेको खुलेको छ ।

अध्यागमन कार्यालयका कर्मचारीहरूले घुस लिएर भिजिट भिसामा खाडी मुलुक पठाउने गरेको विषयमा तीन महिनाअघि नै हेलो सरकारमा उजुरी परेको खुलेको हो । विभिन्न एयरलाइन्स, ट्राभल एजेन्सी र अध्यागमन कार्यालयका कर्मचारीको मिलेमतोमा प्रतिव्यक्ति ४० देखि ५० हजार रूपैयाँसम्म असुलउपर गर्ने गरिएको भन्दै छानबिन गर्न उजुरीमा माग गरिएको थियो ।

अख्तियार दुरुपयोग अनुसन्धान आयोगले छापा मारेर विमानस्थलस्थित अध्यागमन कार्यालयका तत्कालीन प्रमुख अध्यागमन अधिकृत तीर्थराज भट्टराईलाई नियन्त्रणमा लिएपछि यो कुरा सतहमा आएको हो । अख्तियारसँगको बयानमा भट्टराईले गृहमन्त्रीकै सेटिङमा मानव तस्करी हुँदै आएको समेत बताएका छन् ।