किन देउवा र शेखर दुवैको क्याम्पमा अटाएनन् गगन, अब के गर्लान् ?

काठमाडाैं । नेपाली कांग्रेसका महामन्त्री गगन थापा अहिले न शेखर कोइरालाको गुटमा छन्, न शेरबहादुर देउवाको गुटमा । कुनै पनि गुटले नपत्याउँदा उनी कांग्रेसभित्रै अप्ठेरोमा परेका छन् ।

अघिल्लो महाधिवेशन र आम निर्वाचनमा जित्नका लागि गगनलाई नेता स्वीकार गरेर अघि बढ्न तयार रहेको भन्ने विश्वप्रकाश शर्मा पनि गगनलाई छाडेर शेखर कोइरालातिर लागेका छन् ।

हुन त गगनका प्रचारकहरुले विश्वप्रकाश अझै उनकै गुटमा रहेको भनेर हल्ला पिटाइरहेका छन् । तर त्यो सत्य होइन । प्रत्येक महाधिवेशनमा गुट फेर्ने नेताको परिचय बनाएका गगनले पछिल्लो समय शेखर कोइराला समूहबाट महामन्त्रीमा बाजी मारेका थिए ।

त्यतिखेर गगनले लोकप्रिय मत पाउँदा शेखर भने सभापतिमा पराजित हुनुपरेको थियो । अब भने गगनले कस्तो रणनीति बनाउँछन् भन्ने कांग्रेसभित्र बहसको विषय बनेको छ ।