लेखा समिति सभापति पनि मुछिए सहकारी ठगीमा, श्रीमती सञ्चालकहुँदा १४ करोड हिनामिना

काठमाडाैं । आर्थिक हिनामिनाबारे छानबिन गर्नका लागि गठन गरिएको संसदको सार्वजनिक लेखा समितिका सभापति ऋषिकेश पोखरेल र उनकी श्रीमती अन्जना कोइराला पनि सहकारी ठगीमा मुछिएका छन् ।

उनीहरु सहकारीको करीब १४ करोड रुपैयाँ अपचलन प्रकरणमा मुछिएका हुन् । कोशी प्रदेश सहकारी रजिस्ट्रार कार्यालयका रजिस्ट्रार हरिबहादुर खत्रीका अनुसार सहकारीले विभिन्न बैंक तथा वित्तीय संस्थाबाट करीब १४ करोड रुपैयाँ ऋण लिएको देखिन्छ । तर त्यो ऋण कहाँ गयो भन्ने हिसाबकिताब छैन ।

यहाँ यही रकम नै अपचलन भएको हो । उमागौरी सहकारीबाट भएको उक्त करोडौं ठगीमा मोरङ–२ बाट निर्वाचित सांसद तथा प्रतिनिधि सभाको सार्वजनिक लेखा समितिका सभापति ऋषिकेश पोखरेल र उनकी श्रीमती जोडिएका हुन् । कोइराला २०७८ सालसम्म उक्त सहकारीको सञ्चालक थिइन् ।