काठमाडौं । पाकिस्तान–नेपाल फ्रेण्डसीप कल्चरल एशोसियनले भक्तपुरको चागुँनारायण नगरपालिकास्थित खरिपाटीमा एकदिने स्वस्थ्य शिविर सम्पन्न गरेको छ । खरिपाटीस्थित कृष्ण उच्च माध्यमिक विद्यालयमा सम्पन्न स्वास्थ्य शिविरमा दुई सयभन्दा बढी बिरामीले लाभ लिएका छन् ।
८ जना चिकित्सक उपस्थित शिविरमा बिमार देखिएकाहरुलाई निशुल्क औषधि वितरण गरिएको कार्यक्रम एशोसियसनका अध्यक्ष मञ्जुरत्न शाक्यले जानकारी दिए । शाक्यका अनुसार शिविरमा स्त्रीरोग, बालरोग र हाडजोर्नीसँगै दाँतदगायत ८ प्रकारका रोगको उपचार गर्ने प्रबन्ध मिलाइएको थियो ।
स्थानीय समाजसेवी एवम् नेतृ दुर्गेश्वरी वनको मुख्य सक्रियतामा शिविर सम्पन्न भएको हो । चागुँनारायण नगरपालिका र स्थानीय अभियन्ताहरुको सहयोगमा सम्पन्न स्वास्थ्य शिविरको उद्घाटन समारोह भव्य भएको थियो ।
शनिबार विद्यालय प्राङ्गणमा भएको उद्घाटन समारोहमा सहभागी पाकिस्तानी राजदूत एब्रार एच हस्मीले जनताको स्वस्थ्यलाई ध्यानमा राखेर शिविर आयोजना भएकोप्रति खुसी व्यक्त गरेका छन् । त्यस्तै कार्यक्रममा चागुँनारायण नागरपालिकाका मेयर जीवन खत्री, वडा नम्बर ५ का वडाध्यक्ष जयन्द्र खड्का, ७ का वडाध्यक्ष श्यामकृष्ण नयाजु र कृष्ण उच्च माविका प्राधानाध्यापक अरुण चौधरीले पाकिस्तान–नेपाल फ्रेण्डसीप कल्चरल एशोसियनद्वारा स्वास्थ्य विशिर आयोजना भएकोप्रति खुसी व्यक्ति गरेका थिए ।
स्थानीयस्तरमा आयोजना गरिने यस्ता स्वास्थ्य शिविरहरु निकै प्रभावकारी हुने गरेको चागुँनारायण नगरपालिकाका वडाध्यक्ष खड्काले बताए । कार्यक्रममा सहभागी भएर उत्साह प्रदान गरेकोमा पाकिस्तान–नेपाल फ्रेण्डसीप कल्चरल एशोसियनका अध्यक्ष मञ्जुरत्न शाक्यले धन्यवाद ज्ञापन गरेका थिए ।
कार्यक्रमप्रति खुसी हुँदै पाकिस्तानी राजदूत हस्मीले कृष्ण माविका विद्यार्थीहरुलाई अध्ययनका लागि आंशिक छात्रवृत्ति घोषणा गरेका छन् । सँगै उनले विद्यालयलाई प्रोजेक्टरलगायत प्राविधिक उपकरण र कार्यक्रममा नृत्य गर्नेहरुलाई १५ हजार रुपैयाँ पुरस्कार प्रदान गरेका थिए । कार्यक्रममा राजदूत हस्मीले चागुँनारायण नागरपालिकाका मेयर खत्रीलाई मायाको चिनो प्रदान गरेका थिए ।
राजदूत हस्मीले विद्यालय र नगरपालिकालाई आगामी दिनमा पनि आवश्यक सहयोग गर्दैजाने प्रतिबद्धता व्यक्त गरेका छन् । शिविर सम्पन्न गर्न स्थानीय जयप्रशाक वन,दिनेशराज गिरी, मनाेज गिरी र विश्वराम खड्कालगायतको उल्लेख्य सहयोग थियो ।
