नागढुंगा सुरुङको भौतिक प्रगति ८० प्रतिशतभन्दा बढी, अब फ्लाइओभरको काम बाँकी

काठमाडौं । नागढुंगा सुरुङ मार्ग निर्माणको भौतिक प्रगति ८० प्रतिशतभन्दा बढी भएको छ । आयोजनाका अनुसार सुरुङ मार्ग निर्माणको भौतिक प्रगति ८०.५० प्रतिशत पुगेको हो। आयोजनाको वित्तीय प्रगति भने ७४.७० प्रतिशत छ ।

त्यसैगरी आयोजनामा सुरुङतर्फको काम शतप्रतिशत पुगेको छ । जसमा सुरुङ खन्ने र कंक्रिट लाइनिङको काम समेत सकिएको छ । यहाँ २ हजार ६ सय ८८ मिटर लामो मुख्य सुरुङ र २ हजार ५ सय ५७ मिटर लामो उद्धार सुरुङ छ ।

यो आयोजनाको काठमाडौंतर्फको भागमा अन्डरपास, बक्स कल्भर्ट, पुल, ओभरपास र फ्लाइओभरको काम जारी छ । यसमध्ये अन्य संरचनाको काम सकिए पनि फ्लाइओभरको काम भने अझै सकिएको छैन । जसले गर्दा भौतिक प्रगति अझै २० प्रतिशत बाँकी देखिएको छ ।