बालिका बलात्कारका अभियुक्त इन्सपेक्टर सिवाकोटी धरौटीमा रिहा

काठमाडौं । बालिका बलात्कारको आरोपमा पुर्पक्षका लागि थुनामा रहेका प्रहरी निरीक्षक विदुर सिवाकोटी धरौटीमा छुटेका छन् । उच्च अदालत पाटनका न्यायाधीशद्वय टेकप्रसाद गुरुङ र हेमन्त रावलको इजलासले इन्सपेक्टर सिवाकोटीलाई ३ लाख रुपैयाँ धरौटीमा छाड्न बिहीबार आदेश दिएको उच्च अदालतले जनाएको हो ।

उनी बिहीबार नै धरौटी बुझाएर रिहा भएका छन् । यसअघि सिवाकोटीलाई १९ असारमा जिल्ला अदालत काठमाडौंका न्यायाधीश शिशिरराज ढकालको इजलासले पुर्पक्षका लागि थुनामा पठाउने आदेश दिएको थियो ।

सिवाकोटी आफ्नो घरमा घरेलु श्रमिकका रुपमा राखिएकी १२ वर्षकी बालिकालाई जबरस्ती करणी गरेको आरोपमा २३ जेठमा उनी पक्राउ परेका थिए ।