रेडियोका स्टेशन मेनेजरद्वारा सहकर्मीमाथि बलात्कार प्रयास

काठमाडौं । रुपन्देहीको एक रेडियो स्टेशनका मेनेजरले आफ्नै सहकर्मीमाथि बलात्कार प्रयास गरेको घटना सार्वजनिक भएको छ । सैनामैना नगरपालिकामा रहेको रेडियो ‘मलमला’का स्टेसन म्यानेजर टीका खरेलले मादक पदार्थ सेवन गरी आफ्नै सहकर्मीमाथि जबरजस्ती करणी गर्ने प्रयास गरेको घटना बाहिरिएको हो ।

कार्यालयका सहकर्मीले यौन हिंसा गरेको उजुरी परेपछि इलाका प्रहरी कार्यालय बुटवल खरेललाई पक्राउ गरेको छ । खरेललाई जिल्ला अदालत रुपन्देहीबाट थुनामा राख्नका लागि पाँच दिनको म्याद थप गरिएको प्रहरीले जनाएको छ ।

२३ वर्षीय सहकर्मीलाई जबरजस्ती करणी गरेको विषयमा छानबिन भईरहको प्रहरीको भनाइ छ । प्रहरीका अनुसार उक्त घटना भदौ १ गते रातिको हो । रातको समयमा आफू एक्लै भएको समय पारेर कोठामा प्रवेश गरी खरेलले जबरजस्ती करणी गर्न खोजेको पीडितको भनाइ छ । घटना भएको रात महिलाका श्रीमान् घर बाहिर थिए ।