काठमाडौं । गृहमन्त्री रवि लामिछानेले तीन महिनामा तीनवट फायर खोले । तर दुर्भाग्य– उनका तीन फायर आत्मघाती बन्न पुगे ।
के–के न गर्लान् भन्ठानेका रविले गृहमन्त्री हुनेबित्तिकै सरकारको नेतृत्व गरिरहेको दल नेकपा माओवादी केन्द्रका नेता कृष्णबहादुर महराविरुद्ध फायर खोले । अर्थात् सुन तस्करी छानबिन आयोगले दिएको प्रतिवेदनअनुसार महरालाई उनले पक्रन लगाए । भारत भारत भाग्न लागेका महरालाई चैत ५ गते प्रहरीले ५ कपिलवस्तुबाट पक्राउ गर्यो ।
महरा पक्राउ पर्नुलाई कतिपयले ‘गृहमन्त्रीको टेलर’ मात्रै भएको र मूल फिल्म खतरनाक हुने आकलन गरेका थिए । तर परिणाम उल्टो आइदियो– गृहमन्त्री लामिछानेले दबाब थेग्न सकेनन् वा के भयो– गिरफ्तारीलगत्तै अस्पताल भर्ना भएका महरा ४ दिनपछि हाजिर जमानीमा छुटे ।
त्यसैताका गृहमन्त्री लामिछानेले बाँसबारी जग्गा हिनामिना प्रकरणमा उद्योगी एवं कांग्रेस सांसद विनोद चौधरीविरुद्ध फायर खोले । अर्थात् जग्गा हिनामिना प्रकरणमा सीआईबीले चौधरीसँग बयान लियो र क्लिन चिट दियो । चौधरीलाई बयान लिएर ‘वाहीवाही’ पाएका गृहमन्त्रीले उल्टै क्लिनचिट दिएको बुझेपछि आमनागरिकमा निराशा बढेको छ ।
त्यस्तै उनले खालेको तेस्रो र सबैभन्दा हानिकारक फायर हो– कान्तिपुर मिडिया ग्रुपका अध्यक्ष कैलाश सिरोहियाविरुद्धको । धनुषाका एक स्थानीयसँगै नागरिकता नम्बर मिलेको अभियोगमा पक्राउ परेका सिरोहिया पनि कसुर प्रमाणित नभएपछि हाजिरी जमानीमा छुटे । विगतमा आफ्नो दोहोरो नागरिकताबारे लगातार समाचार लेखेको र पछिल्लो समय सहकारी घोटलाबारे निरन्तर फलोअप गरिरहेका कारण गृहमन्त्री लामिछानेले सिरोहियालाई निसानामा पारेका थिए । तर, उल्टै सिरोहिया निर्दोष प्रमाणित भएपछि रविविरुद्ध ‘ब्याकफायर’ भएको छ ।
स्मरणीय छ कि, रविले नागरिकतामा बेइमानी गरेको प्रमाणित भएपछि फेरि नागरिकता बनाएका थिए र पक्राउ गर्नुअघि सिरोहिया नेपाली नै नभएको, फरक–फरक नागरिकता भएको, नागरिकतामा हस्ताक्षर र मिति नै नभएकोजस्ता हल्ला चलाइएको थियो । जसलाई धेरैले पत्याएका थिए ।
यसरी उच्च आश गरेका गृहमन्त्री लामिछानेले प्रतिशोध र आवेगका कारण फितला कदम चाल्दा नागरिकमा निराशा बढेको छ । विगतमा ठूल्ठूला भ्रष्टाचारका फाइल खोलेर देशमा सुशासनको बहार ल्याउने उद्घोष गरेका गृहमन्त्री लामिछानेका पछिल्ला गतिविधि पट्यारलाग्दा छन् । रै त पनि मान्छेहरु अझै उनीसँग आश गर्न अभिषप्त छन् ।
