काठमाडौं । बुधबार भएको सौर्य एयरको विमान दुर्घटनाको रहस्य खुलेको छ । दुर्घटनमा बाँच्न सफल क्याप्टेन मनिष शाक्यले उक्त रहस्योद्घाटन गरेका हुन् ।
बिहीबार बिहान केएमसीकी मेडिकल डाइरेक्टर डा. मिना थापासँग उपचाररत क्याप्टेन शाक्यले जहाजलाई कन्ट्रोल गर्न नसकिएको कुरा खुलाएका हुन् ।
मिनाका अनुसार उनले भनेको कुरा यस्तो छ–
‘करिब १०० फिटमा पुगेपछि जहाज माथि लैजान सकिनँ । तल खस्न थाल्यो । एकैपल्ट थिचिएको जस्तो अनुभव भयो । सानो प्वालबाट आफैं बाहिर निस्किएँ । त्यसबाट नस्किन लाग्दा कसैले मलाई तानेको याद छ ।’
काठमाडौंबाट बुधबार बिहान ११ः११ मा पोखराका लागि उडेको ९ एन–एएमई सीआरजे विमान त्रिभुवन अन्तर्राष्ट्रिय विमानस्थलबाट उडेलगत्तै परिसरभित्रै दुर्घटना भएको थियो । घटनामा परेर १८ जनाको मृत्यु भएको छ भने पाइलट शाक्यको घाइते अवस्थामा उद्धार गरेर केएमसी अस्पतालमा ११ः३० मा पुर्याइएको थियो ।
अस्पतालका अनुसार क्याप्टेन शाक्यको शरीरका विभिन्न भागमा चोटपटक लागेको छ । डा. थापाका अनुसार उनी खतरामुक्त छन् ।
