काठमाडौं । केही समयअघि प्रतिनिधिसभाकी उपसभामुख इन्दिरा रानाले अमेरिकी दूतावासलाई लेखेको एउटा पत्र बाहिरियो । जहाँ उपसभामुख रानाले एक कार्यक्रमका लागि पाँचजना नेपालीलाई अमेरिका लैजान आग्रह गरेकी थिइन् । उपसभामुखकै लेटरहेडमा रानाले खुलेयाम यस्तो आग्रह गरेको कुरा कतै छिपेको छैन ।
उक्त पत्रका कारण चौतर्फी आलोचना भएपछि रानाले भनिन्, ‘विदेश पठाइदिने भनिएका मान्छेहरुलाई म चिन्दै चिन्दिनँ ।’ अझ सप्रमाण तथ्यहरु बाहिरिएपछि भनिन्, करुणाभावले त्यसो गरेको हुँ, मेरो नियत खराब थिएन ।’
अझ ती व्यक्तिलाई अमेरिका पठाउनका लागि रानाले पैसा लिएको, तर भिसा नलागेपछि फेरि पठाउँछु भनेर झुलाएको भन्ने विवरणसहितको अडियो पनि सार्वजनिक भएको छ । यसरी उपसभामुख रानाले अमेरिका पठाउने नाममा धन्दा गरेको प्रष्ट हुँदा पनि राष्ट्रिय स्वतन्त्र पार्टी भने चुपचाप बसिरहेको थियो । चारैतिरबाट पार्टीको धारणा माग भएपछि उसले आइतबार एक विज्ञप्ति जारी गर्यो । र भन्यो, ‘उपसभामुख राना निष्कलंक र उज्यालो छविकी हुनुहुन्छ । सत्तागठबन्धनले नियोजितरुपमा फसाउन खाजेको मात्रै हो ।’
यसरी उपसभामुख रानाले बेइमानी गरेको प्रष्ट र छताछुल्ल हुँदाहुँदै पनि जोगाउन खोज्नुले रास्वपाको ओरिजिनल चरित्रलाई बाहिर ल्याइदिएको छ । विगतमा आरोप लाग्नेबित्तिकै ढाकाकुमार श्रेष्ठलाई पार्टीबाट निकालेर प्रशंसा पाएको रास्वपालाई अहिलेको काण्डले भने अप्ठेरोमा पारेको छ ।
हुनतः उपसभामुख राना विगतदेखि नै विवादमा मुछिँदै आएकी पात्र हुन् । बालबालिकाको अवैध कारोबार गरेको आरोप लागेकी उनी आफूलाई भने समाजसेवी बताउँदै आएकी छिन् । विगतमा अनेक एनजिओ, आइएनजिओमा काम गरेकी रानालाई रास्वपाले टिपेर उपसभामुख बनाएको कारणबारे पार्टीभित्रै पनि कुरा उठेको बताइन्छ ।
संयुक्त राष्ट्रसंघको संयन्त्र ‘कमिसन अन द स्टाटस अफ वुमेन’ को ६७ औं सत्र (सीएसडब्लू ६७) मा सहभागी हुन जाने क्रममा रानाले प्रतिनिधिका रूपमा चार पुरुष र एक महिलालाई आफूसँगै अन्तर्वार्ताको मिति मिलाइदिन अमेरिकी दूतावासलाई पत्र लेखेकी थिइन् । उपसभामुखको लेटरप्याडमा लेखिएको पत्रमा उनले उपेन्द्र गौतम, सुष्मा लामा, राजेश लामा, सुजन घर्ती मगर र धनप्रसाद गुरुङ पनि राष्ट्रसंघीय उक्त कार्यक्रमको प्रतिनिधि भएको दाबी गरेकी थिइन् ।
