अझै सुल्झेन अखिल क्रान्तिकारीको विवाद, मतगणना अनिश्चित

काठमाडौं । नेकपा (माओवादी केन्द्र) सम्बद्ध विद्यार्थी संगठन अखिल (क्रान्तिकारी)मा विवाद हुँदा काठमाडौंमा मतगणना सुरू हुन सकेको छैन । शनिबार मतदान सम्पन्न भएकामध्ये भूगोलका सात प्रदेशको गणना सकिइसकेको छ । तर गैरभूगोलका उपत्यका विशेष र विश्वविद्यालय प्रदेशको गणना भने सुरू नै हुन सकेको छैन ।

काठमाडौंको भृकुटीमण्डपमा रहेको वाल्मीकि क्याम्पसमा दुई प्रदेशको मतदान भएको थियो । त्यहाँ ५२२ मत खसेको छ । मतदान सकिएर गणना सुरू गर्ने छलफल क्रममा भएको विवाद अहिलेसम्म समाधान नहुँदा तीन दिनदेखि मतपेटिका वाल्मीकिमा थन्किएको हो ।

आइतबार पनि मतणना सुरू नभएपछि निर्वाचन समितिले अर्को सूचना जारी गरी सोमबार मध्याह्न १२ बजेदेखि मतगणना सुरू हुने जानकारी गराएको थियो । तर सोमबार पनि मतगणना सुरू हुन सकेन । भूगोलका सात प्रदेशको गणना हुँदा अध्यक्षमा विजय प्रकाश सापकोटा र हेमन्त राईबीच कडा टक्कर देखिएको छ । सापकोटा ४८५ र राईले ४६१ मत ल्याएका छन्।

त्यस्तै उपदेश यादवले २२१ र सुदिन पौडेलले १४४ मत प्राप्त गरेका छन् ।