काठमाडाैं । करिब तीन महिनाअघिदेखि हिरासतमा रहेका रास्वपा सभापति रवि लामिछानेले पार्टीको तर्फबाट पाउनुपर्नेजति साथ नपाएको भन्दै गुनासो गरेका छन् ।
लामिछानेसँग नियमित सम्पर्कमा रहेका रास्वपाका एक नेताका अनुसार पार्टीको भूमिका कमजोरको प्रति उनले गुनासो गरेका हुन् ।
पक्राउ पर्नेबित्तिकै पार्टीले रविको पक्षमा आन्दोलन घोषणा गरेको थियो । र, आन्दोलन चर्किँदै जाँदा पार्टीले खुट्टा झिक्यो । त्यसपछि ओइलाएको आन्दोलन तङ्ग्रिन सकेको छैन ।
लामिछाने समर्थकले कतैकतै छिटफुट प्रदर्शन गरे पनि आन्दोलन झन्पछि झन् भुत्ते हुँदै गएको छ । यसबीच प्रहरीले अनुसन्धानको फाइल सरकारी वकिलको कार्यालयलाई बुझाउँदै छ र मुद्दा चलाउँदैछ ।
सहकारी ठगीसँगै संगठित अपराध र सम्त्ति शुद्धीकरणमा मुद्दा चलाइँदैछ । स्रोतका अनुसार सम्पत्ति शुद्धीकरणको मुद्दा निकै पेचिलो बनेको छ ।
अहिले थुनछेक बहसपछि कास्की अदालतले लामिछानेलाई धरौटीमा छाड्ने आदेश गरे पनि प्रहरीले फेरि पक्रिएर रुपन्देही लैजाने र त्यहाँ पनि मुद्दा चल्ने सम्भावना प्रबल छ ।
