काठमाडौं । सहकारी ठगी र संगठित अपराध गरेको आरोपमा पाँच दिनदेखि कास्की प्रहरीको हिरासतमा रहेका रवि लामिछानेले प्रहरीलाई इन्कारी बयान दिएका छन् । प्रहरीसँगको बयानमा उनले आफूमाथि लागेका आरोप अस्वीकार गरेका हुन् ।
नेपाल प्रहरीको केन्द्रीय अनुसन्धान ब्यूरो (सीआईबी)ले रविको बयान लिइरहेको छ । मुख्यगरी सूर्यदर्शनसहित पाँच वटा सहकारीबाट ६५ करोड बढी रकम गोरखा मिडिया नेटवर्कमा ल्याएर अपचलन गरेको आरोप रविमाथि छ । तर रविले भने आफू गोरखा मिडियामा पुग्दा सहकारीको रकम भित्रिसकेको बयान दिएका छन् ।
यसैगरी आफू कामदार भएकाले त्यसको सम्पूर्ण जिम्मेवारी तत्कालीन अध्यक्ष जितेन्द्र बाबु राई (जीबी)ले लिनुपर्ने उनको भनाइ छ । मिडियाका तत्कालीन प्रबन्ध निर्देशन रहेका रविको संलग्नताबारे प्रहरीले अनुसन्धान गरिरहेको छ । रविका पार्टनर छविलाई कास्की प्रहरीले बयान लिइसकेको छ ।
सहकारी ठगीसम्बन्धी विशेष संसदीय छानबिन समितिलाई सूर्यदर्शन सहकारीका कोषाध्यक्ष मदनकुमार रम्तेलले दिएको बयानअनुसार पनि रविमाथि लगाइएका आरोपबारे प्रहरीले सोधेको थियो । रम्तेलले सहकारीको रकम बैंकमा जम्मा गरेका व्यक्ति रवि नै हुन् भन्ने बयान दिएका थिए ।
प्रहरीको प्रश्नमा रविले सहकारीको आफू सदस्य नभएको र त्यो अवस्थामा आफूले ऋण लिने कुरा नभएको बयान दिएका छन् । ग्यालेक्सीमा रहँदा कम्पनीको नाफा र घाटाको विश्लेषण नगरी धमाधम किन चेक काटेको ? भनेरसमेत प्रहरीले रविसँग प्रश्न गरेको थियो । रविले प्रशासनिक जिम्मेवारीमा रहेकाले कर्मचारीलाई तलब, सुविधा र अन्य प्रशासनिक खर्चको चेक आफूले काटेको बयान दिएका छन् ।
सूर्यदर्शनलगायत सहकारीको पैसा गोरखा मिडियामा ल्याएर दुरूपयोग गरेको भन्दै संसदीय छानबिन विशेष समितिले लामिछानेसहित ४ जनालाई कारबाही गर्न सिफारिस गरेको थियो । सोही प्रतिवेदन कार्यान्वयनका क्रममा रविलाई पक्राउ गरिएको हो । प्रहरीले गत शुक्रबार राति काठमाडौंको वनस्थलीस्थित रास्वपाको कार्यालयबाट लामिछानेलाई पक्राउ गरेको थियो । उनलाई हिरासतमा राखी अनुसन्धान गर्न अदालतले ६ दिनको अनुमति दिएको छ । जुन भोलि सकिँदै छ ।
