हिरो-हिरोइनका छोराछोरीलाई म्युजिक भिडिओ खेलाउन पनि सहकारीको रकम दुरुपयोग

काठमाडौं । हिरो, हिरोइनका छोराछोरीलाई म्युजिक भिडिओ खेलाउनका लागि पनि सहकारीको रकम दुरुपयोग भएको पाइएको छ ।

सहकारी छानबिन समितिको प्रतिवेदनअनुसार नायक शिव श्रेष्ठका छोरा तथा नायिका करिश्मा मानन्धरको छोरीलाई म्युजिक भिडियो र सिनेमामा डेब्यु गराउने नाममा सहकारीको ठूलो रकम अपचलन भएको पाइएको हो ।

उनीहरुले काठमाडौंको कीर्तिपुरस्थित दर्शन बचत तथा ऋण सहकारीको रहम दुरुपयोग गरेको पाइएको हो । त्यसैगरी नेपाल प्रहरीका पूर्वएआइजी छविराज जोशीका छोरा रोचकलाई समेत म्युजिक भिडियो र सिनेमामा डेब्यु गराउने भनेर सहकारीबाट लगानी गरेको ठूलो रकम फसेको सहकारीसम्बन्धी संसदीय विशेष समितिले सार्वजनिक गरेको प्रतिवेदनमा उल्लेख छ ।

२०६७ साउन ७ गते डिभिजन सहकारी कार्यालय काठमाडौंमा दर्ता भएको सहकारी संस्थापक अध्यक्ष दिनेश दर्शनधारी हुन् । अहिले पनि सहकारीका अध्यक्षमा दर्शनधारी नै छन् । २०६७ मा स्थापना भएको सहकारीमा अन्य पाँचवटा सहकारी संस्था पनि मर्ज भएका थिए । दर्शन बचत तथा ऋण सहकारीमा जम्मा कर्जा १ अर्ब ४५ करोड १३ लाख ४५ हजार २१३ रुपैयाँ छ । जसमा प्रावधान बमोजिम जम्मा ६ करोड २५ लाख ६७ हजार २६० रुपैयाँ कर्जा लगानी गरिएको छ ।