काठमाडौं । खासगरी युवामाझ अतिलोकप्रिय काठमाडौंका मेयर बालेन शाह क्रमशः आलोचित हुन थालेका छन् । खासगरी अतिसस्तो र धारावाहिक स्टाटसका कारण उनको आलोचना हुन थालेको हो । प्रायः शुक्रबार साँझ स्टाटस लेख्ने गरेका बालेनले पछिल्लो समय जुनकुनै दिन, जुनकुनै समय पेचिलो स्टाटस लेख्न थालेका छन् ।
खासगरी प्रधानमन्त्री एवम् नेकपा एमालेका अध्यक्ष केपी शर्मा ओलीप्रति ज्यादा आक्रामक ढंगमा प्रस्तुत हुँदै आएका बालेनले शनिबार बाल दिवसको अवसरमा लेखेको स्टाटस विवादित भएको हो । उनले फेसबुक वालमा लेखेका छन्, ‘पीडित बालिकाहरु प्रम खड्ग प्रसाद ओलीको कारण न्याय नपाएर मर्नु परेको कारण बाल दिवसको शुभकामना दिन सकिनँ, सो सुभकामना स्वय प्रम ज्यूलाई नै टक्राउन चाहन्छु, ग्रहण गर्नुहोला !’
बालेनको यो स्टाटसपछि उनका भक्तहरुले ‘नाबालिग कुट्नेलाई मेरो प्रधानमन्त्रीले जोगाउँछ’ भनेर सामाजिक सञ्जालमा ‘खड्क ओली होसियार’ ह्यासट्याग अभियाननै चलाएका छन् । तर, समाजमा तार्किक र वौद्धिक व्यक्तित्वले भने बालेनको उक्त स्टाटसलाई ‘सस्तो र लोकप्रियतावादी’ भनेर टिप्पणी गरिरहेका छन् । कतियले उनलाई स्टाटस लेख्ने मामलामा धरानका मेयर हर्क साम्पाङकै बाटोमा हिँडेको भनेर पनि आलोचना गरिरेहका छन् ।
