धनराज र पूर्वश्रीमतीको फेकफोटो सामाजिक सञ्जलमा भाइरल, के हो वास्तविकता ?

काठमाडौं । अहिले सहकारी ठगी प्रकरणमा जोडिएका नेपाली काङ्ग्रेसका उपसभापति एवं सांसद धनराज गुरुङको पक्ष र विपक्षमा अनेक मत प्रकट भइरहेका छन् । ललितपुरस्थित मितेरी बचत तथा ऋण सहकारी संस्थाका अध्यक्ष कुम्मराज गुरुङले सहकारीको रकम घोटालामा गुरुङको नाम लिएपछि उनको पक्ष र विपक्षमा मतहरु प्रकट हुन थालेका हुन् ।

सहकारी अध्यक्ष गुरुङले धनराज गुरुङकी पूर्वपत्नी ज्योती गुरुङ व्यवस्थापक रहँदा १२ देखि १४ करोड रुपैयाँसम्म दुरुपयोग भएको र उक्त घटनाबारे कांग्रेस उपसभापति गुरुङ पनि जानकार रहेको बताएका थिए । ज्योती चार वर्षदेखि फरार सूचीमा छिन् । धनराजले भने ज्योतीसँग डिभोर्स भइसकेको र सहकारीको रकम अपचलनमा आफू दोषी नरहेको दाबी गर्दै आएका छन् ।

ठगी प्रकरणमा जोडिएपछि त्यसबाट जोगिन सांसद गुरुङले नक्कली डिभोर्स गरेको भन्दै सामाजिक सञ्जालमा उनको आलोचना पनि भइरहेको छ । अहिले उनै सांसद गुरुङ र पूर्वपत्नी ज्योती सँगै छन् र त्यो डिभोर्स नक्कली हो भन्ने देखाउन सामाजिक सञ्जालमा विभिन्न किसिमका पोस्ट आइरहेका छन् । त्यसैको नतिजा हो सांसद धनराज गुरुङ र ‘लभ भावी’को फोटो । सामाजिक सञ्जालमा अहिले सांसद गुरुङ एक युवतीसँग विमानमा चढिरहेको बेला खिचिएको जस्तो देखिने फोटोले बढी चर्चा पाएको छ । तर उक्त फोटो फेक भएको पुष्टि भएको छ ।