फेरि ब्युँतने भयो रवि लामिछानेको दोहोरो पासपोर्ट विवाद

काठमाडौं । पूर्व गृहमन्त्री तथा रास्वपाका सभापति रवि लामिछानेको राहदानी प्रकरणको मुद्धा फेरि ब्युँतने भएको छ । भर्खरै सहकारी प्रकरणमा बयान दिइसकेका लामिछानेको राहदानीसम्बन्धी मुद्दा पनि ब्युँताउन लागिएको हो ।

२०७९ साल चैतमा तत्कालीन सरकारले रोकेको मुद्धालाई अहिलेको सरकारले ब्युँताउनका लागि महान्यायाधिवक्तासँग छलफलसमेत गरिसकेको बुझिएको छ । जिल्ला प्रहरी परिसर काठमाडौंले २०७९ चैतमा दोहोरो राहदानीमा अनुसन्धान सकेर जिल्ला सरकारी वकिल कार्यालयमा मुद्दा चलाउनु नपर्ने रायसहितको प्रतिवेदन पठाएपछि रोकिएको थियो ।

प्रहरीको रायमा सहमति जनाउँदै जिल्ला सरकारी वकिलको कार्यालय काठमाडौंले फाइल उच्च सरकारी वकिल कार्यालयमा पठाइएको हो । उच्चले पनि सदर गरेर महान्यायाधिवक्ताको कार्यालयमा पठाएको थियो । उतिबेला महान्यायाधिवक्ताको कार्यालयले लामिछानेविरुद्ध राहदानी दुरुपयोगमा मुद्दा नचलाउने निर्णय गरे पनि यो निर्णयमाथि नै न्यायिक परीक्षणको बाटो भने खुला भएकाले यसबारे छलफल थालिएको बुझिएको छ ।

रविले अमेरिकी र नेपाली पासपोर्ट एक साथ प्रयोगमा ल्याएको भन्दै उजुरी परेको थियो ।