काठमाडौं । अहिले सामाजिक सञ्जालमा एउटा तस्वीर भाइरल भएको छ । सिन्धुलीस्थित तीनपाटन गाउँपालिका– ७ मा एउटी महिलाले शव बोकेको र अरु कोही पनि मलामी नदेखिएको उक्त तस्वीर भाइरल भएको हो ।
वडाध्यक्ष युवराज पहाडीले फेसबुकमार्फत मलामी जाँदै गरेको दुईवटा तस्वीर सार्वजनिक गरेका छन् । जसमध्ये एउटामा उनी आफैंले शव बोकेका छन् भने अर्कोमा एउटी महिलाले शव बोकेकी छिन् । र, शवको पछाडि एकजनामात्रै मान्छे हिँडिरहेको देखिन्छन् ।
वडाध्यक्ष पहाडीले उक्त तस्वीर सार्वजनिक गर्दै लेखेका छन्, ‘हामी राजनिती गर्नेले के भनेर राजनीति गरिरहने हो गाउँमा ! मलामीसम्म जाने मान्छे छैन । अनि अर्को कुरा, हाम्रो समाज कुन संस्कार मान्दै छौं ? मान्छे मर्दा पनि जातभातको कुरा गर्ने अशिक्षित समाजसंग सारै लज्जित छु । तीनपाटन गाउंपालिका वडा नं ७ बस्ने कृष्ण माया पहाडी आमाको स्वर्गमा बास होस् ! हार्दिक श्रद्धाञ्जली ।’
वडाध्यक्ष पहाडीका अनुसार आइतबार स्थानीय ६५ वर्षीया कृष्णमाया पहाडीको कालगतिले मृत्यु भएको हो । र, गाउँ ठूलै भए पनि मृतक पहाडीको शव बोक्ने तथा मलामी जाने मान्छेको अभाव भयो । यसको मुख्य कारण चाहिँ गाउँमा मान्छे नभएर मलामीको अभाव भएको होइन, जातीय विभेद प्रमुख समस्या हो ।
वडाध्यक्ष पहाडीका अनुसार उक्त ठाउँमा ७, ८ घरमात्रै पहाडी अर्थात् बाहुनहरु छन् । वरिपरि सबै दलित तथा जनजाति छन् । बाहुनको शवलाई दलित तथा जनजातिले छुन हुँदैन भनेपछि गाउँमा शव बोक्ने मान्छेकै अभाव भएको हो ।
