अन्ततः पाँच वर्षका लागि नवीकरण भयो एनसेलको लाइसेन्स

काठमाडौं । नेपालमा अर्बौं कर छलीको आरोप लागेको एनसेलको लाइसेन्स पाँच वर्षका लागि नवीकरण भएको छ । सरकारले विभिन्न सर्तसहित एनसेलको लाइसेन्स नवीकरण गरेको हो ।

गत साता बसेको मन्त्रिपरिषद् बैठकले एनसेलको लाइसेन्स नवीरकण गर्ने निर्णय गरेको थियो । त्यसपछि मुलुकको दूरसञ्चार नियामक निकाय नेपाल दूरसञ्चार प्राधिकरणले एनसेलको लाइसेन्स पाँच वर्षका लागि नवीकरण गरेको हो ।

लाइसेन्स नवीकरण भएको दूरसञ्चार प्राधिकरणको पत्र एनसेलले बुझेको छ । तर, यसबारे एनसेलले औपचारिक रूपमा केही सार्वजनिक भने गरेको छैन । एनसेलले आइतबार थप १ अर्ब रुपैयाँ भुक्तानी गरेपछि लाइसेन्स नवीकरण गरिएको भनिएको छ ।

एनसेलले यसअघि १४ जेठमा ४ अर्ब रुपैयाँ बुझाएको थियो ।