प्रचण्ड भन्छन्- माओवादी नै नेपालको नयाँ शक्ति हो

काठमाडौं । नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ले नेपालको नयाँ शक्ति भनेकै माओवादी केन्द्र भएको बताएका छन् ।

नेपालगञ्जमा सञ्चारकर्मीसँग कुरा गर्दै उनले नयाँ शक्ति हुनलाई कुनै राजनीतिक परिवर्तनको कोर्स पूरा गरेर आएको हुनुपर्ने उल्लेख गर्दै आजका दिनमा माओवादी नै नयाँ शक्ति भएको बताएका हुन् ।

उनले आफू नेतृत्वको सरकारले अघि सारेका सुशासन, सामाजिक न्याय र समृद्धिका एजेण्डा नै अब मुलुकलाई अघि बढाउने केन्द्रीय एजेण्डा हुने पनि बताए । यसकै माध्यमबाट समाजवादमा पुग्न सकिने पनि उनले विश्वास व्यक्त गरे ।

अर्को एक प्रसंगमा अध्यक्ष प्रचण्डले पार्टीभित्र एउटा सिस्टम बसालेर अर्को भूमिकामा जाने सोच गरेको बताए ।