न्यूरोडमा सडक विभाग र महानगरबीच घम्साघम्सी, स्थिति तनावग्रस्त

काठमाडौं । फुटपाथ विस्तारको विषयलाई लिएर काठमाडौंको न्यूरोडमा सडक विभाग र महानगरबीच घम्साघम्सी भएको छ । फुटपाथ विस्तारका लागि महानगरले भत्काएको सडकमा विभागले पिच गर्न खोजेपछि सोमबार दुई पक्षबीच घम्साघम्सी भएको हो ।

काठमाडौं महानगरपालिकाले फुटपाथ विस्तारका लागि काटेको सडकमा सोमबार बिहानैदेखि सडक विभागअन्तर्गत सडक डिभिजन काठमाडौंले सडक कालोपत्र गरिरहेको थियो। नगर प्रहरीले कालोपत्रे रोक्न खोजेपछि स्थिति तनावपूर्ण भएको हो ।

सडक विभागबाट अनुमति नै नलिई न्यूरोडका सडक काटिएको भन्दै सडक विभाग र महानगरबीच केही समयदेखि टसल देखिएको थियो।

सोमबार दुई पक्षबीच तनाव हुने देखिएपछि न्यूरोड क्षेत्रमा ठूलो संख्यामा नेपाल प्रहरी खटाइएको थियो ।