प्रधानमन्त्री ओलीले ‘हराएका वर्षहरु’का प्रकाशलाई भेट्ने

काठमाडौं । प्रधानमन्त्री केपी शर्मा ओलीले हेर्ने कथाको ‘हराएका वर्षहरू’ अंकका पात्र प्रकाश तामाङसित भेट्ने इच्छा व्यक्त गरेका छन् । प्रधानमन्त्री ओलीले अहिले युट्युव ट्रेण्डिङको एक नम्बरमा रहेको उक्त कथाका पात्र प्रकाशलाई भेट्ने चाहना व्यक्त गरेका हुन् ।

सामाजिक सञ्जालमा प्रकाशलाई भेट्ने चाह गर्दै उनले भनेका छन्, ‘हामी दुःखको आँसुसँग मात्र परिचित छौँ । चाहे सुखका हुन् वा दुःखका, भावको आयतन शरीरले थेग्न नसकेपछि आँसु झर्ने रहेछ । हेर्ने कथाको पछिल्लो एपिसोड ’हराएका वर्षहरू’ हेरेँ । प्रकाश तामाङ (काले मोक्तान)को परिवारसँग मिलनको दृश्यले आँसु आयो।’

उनले अझै भनेका छन्, ‘सोचें– यस्ता कति प्रकाशहरु वर्षौंदेखि हराएका होलान् ! एक पटक प्रकाशलाई भेटेर उहाँको कुरा सुन्न चाहन्छु। विद्या चापागाईं प्रभावशाली ‘स्टोरी टेलर’ हुनुहुन्छ । हेर्ने कथामा उहाँले प्रस्तुत गरेका अरु कयौं कथाहरू पनि हेरेको छु। विद्या चापागाईंसँग पनि भेटेर यस विषयमा कुरा गर्ने छु। यो मर्मस्पर्शी कथालाई दृश्यमा ल्याइदिएकोमा हेर्ने कथा टिमलाई धन्यवाद !’