काठमाडौं । आफूले विहे गर्न लागेको केटा वा केटीको अश्लील भिडियो देख्दा कस्तो होला ? हामी अनुमान पनि गर्न सक्दैनौं । तर, काठमाडौंकै एकजना पुरुषले त्यस्तै निर्मम परिस्थितिको सामना गर्नुपरेको छ । विहे गर्न लागेकी केटीको पूर्वप्रेमीले अश्लील भिडिओ पठाएपछि उक्त परिवारमा निकै तनाव बढेको र विहे भाँडिएको छ ।
आफ्नो गोपनियता भंग गरेको भन्दै केटीले पूर्वप्रेमी सञ्जय खनालविरुद्ध प्रहरीमा जाहेरी दिएकी छिन् । प्रहरीले विहे गर्न लागेका केटाकेटीको परिचय भने गोप्य राखेको छ । प्रहरीका अनुसार झन्डै एक वर्ष अगाडि उक्त केटी र ३४ वर्षीय सञ्जय खनालबीच स्न्यापच्याटमा भेट भएको थियो । स्न्यापच्याटमा सामान्य कुरा हुँदै अगाडि बढेको सम्बन्ध मोबाइल नम्बर साटासाट भई ह्वाट्सएपसम्म पुग्यो ।
उनीहरूबीच घनिष्ट सम्बन्ध स्थापित भयो । दुवैजना काठमाडौंमै बस्ने भएकाले उनीहरुबीच भेटघाट पनि भइरहन्थ्यो । भेटघाट बाक्लिँदै जाँदा उनीहरूबीच शारीरिक सम्बन्धसमेत हुन थाल्यो । खनालले यौन गतिविधिको भिडिओ बनाउनुका साथै फोटो खिचेर राख्थे । युवतीले फोटो र भिडिओ डिलिट गर्न अनुरोध गर्थिन्, तर खनालले केही समयपछि डिलिट गर्छु भन्दै विश्वास दिलाउँथे । पछि युवतीको अर्कै युवकसँग बिहेको कुरा चल्यो । बिहे गर्ने भनेका युवकसँग युवती नजिकिइन् ।
एक दिन ती युवकले हुनेवाली श्रीमती र सञ्जय खनालको सम्बन्ध नजिक रहेको चाल पाए । त्यसपछि आफू, युवती र सञ्जय खनालबीच ह्वाट्सएपमा ग्रुप च्याट भयो । त्यस क्रममा उनले खनाल र युवतीबीचको सम्बन्धका बारेमा बुझ्न खोजे । र, अन्ततः सञ्जयले विगतमा खिचेका अश्लील फोटो, भिडिओ नै ग्रुपच्याटमा हालिदिए । यससँगै, अश्लील शब्दसहितको मेसेज र शारीरिक सम्बन्ध राखेको भिडिओ बाहिरिएपछि आफ्नो अपमान तथा चरित्रहत्या भएको भन्दै युवतीले प्रहरी कार्यालयमा सञ्जय खनालको नाममा किटानी जाहेरी दिएकी दिइन् ।
त्यसपछि प्रहरीले खनाललाई नियन्त्रणमा लिएर अनुसन्धान गर्यो । प्रहरी अनुसन्धानमा सञ्जयले कमजोरी स्वीकारेका छन् । अहिले खनाललाई प्रतिवादी बनाएर जिल्ला सरकारी वकिलको कार्यालयले काठमाडौं जिल्ला अदालतमा अभियोगपत्र दर्ता गरेको छ ।
