काठमाडौं । ललितपुरमा एउटी महिलामाथि आफ्नै देवरसहित तीनजना पुरुषले सामुहिक बलात्कारको प्रयास गरेको घटना सार्वजनिक भएको छ । घरमा एक्लै भएका बेला देवर र देवरका साथीहरुले सामूहिक बलात्कार प्रयास गरेपछि ती महिला प्रतिकार गरेर उम्कन सफल भएकी थिइन् ।
तर, बिडम्बना ती महिलाका श्रीमानले उल्टै बलात्कार प्रयास गर्नेहरुलाई नै साथ दिएको खुलेको छ । असार ३० गते कुपण्डोलस्थित आफ्नै घरमा सामूहिक बलात्कारको प्रयास भएकी उनलाई प्रहरीमा उजुरी दिननै धेरै समय लाग्यो । अनेक उल्झनपछि उनले प्रहरीमा उजुरी दिइन् । प्रहरीले अहिले उनको नाम ‘जावलाखेल–२’ राखेर घटनाको अनुसन्धान गरिहेको छ ।
तर, अझै उनीमाथि बलात्कार प्रयास गर्नेहरु पक्राउ परेका छैनन् । उनका श्रीमानले उनलाई पटक–पटक घरायसी कुरा भएकाले पारिवारिक माहोलमै मिलाउन दबाब दिएका थिए । ३० वर्षीया ‘जावलाखेल–२’का श्रीमान पेसाले डाक्टर हुन् ।
‘जावलाखेल–२’ले देवरसँगै रौतहट विश्रामपुर नगरपालिका– ४ स्थायी घर भई हाल ललितपुर महानगरपालिका–२ बस्ने ३५ वर्षीय सचिन यादव र परोहा नगरपालिका–४ घर भई ललितपुर महानगरपालिका वडा नम्बर २ बस्ने २३ वर्षीय विपुल यादवविरुद्ध प्रहरीमा जाहेरी दिएकी छिन् ।
