काठमाडौं । पशुपतिनाथ मन्दिरमा साउन महिनाभर चलेको बहुविवादित कोटीहोमले धेरै पात्रलाई चर्चामा ल्यायो । नामै नसुनेकाहरु रातारात भइरल भए, प्रख्यात भनिएकाहरु कुख्यात कहलिए । हो, उक्त कोटीहोमले चर्चा चुल्याएको धेरै पात्रमध्येका एक हुन्– कृष्ण दमाइ ।
दलितलाई कोटीहोमको व्यासस्थान दिएको विषयले धेरैको ध्यान खिच्यो । कतिपयले समानताका पक्षमा बाहुनले गरेको क्रान्तिका रुपमा व्याख्या गरे त कतिले हिन्दूधर्मकै बेइज्जत गरेको टिप्पणी गरे ।
यसबारे यत्ति भनौं, ‘दलितभित्र फस्टाएको बाहुनवाद वा बाहुनभित्र मौलाएको दलित चिन्तन’ दुवै खतरनाक छ । तर अहिलेको प्रसङ्ग यो हो कि, बाहुनले चर्चामा ल्याइदिएका कृष्ण दमाइ रुँदै मिडियामा छन् । उनले एउटा युट्युव च्यानललाई अन्तरवार्ता दिँदै भनेका छन्, ‘चर्चा कमाएर मात्रै के गर्नु ? मलाई बिहान–बेलुकाकै छाक टार्न मुस्किल छ ।’
अझ भकानिँदै उनी भन्छन्, ‘मैले समाज र धर्मका लागि आफ्नो पीडालाई लुकाएर बसेको छु । मेरोबारे बुझ्ने भए राजधानीमा बसेर होइन, गाउँमा आइदिनुस् । खासमा म अहिले बोल्नै नसक्ने अवस्थामा छु । अस्ति पशुपतिमा पनि भावुक हुन्छु भनेर आफ्नो पीडाको पोको नै खोलिनँ । तर जे जस्तो भए पनि म हिन्दू धर्ममा भएका रुढीवादी परम्परा हटाउने अभियानमा छु ।’
