काठमाडौं । ठूला–ठूला परिवर्तनको कुरा गर्ने नेकपा माओवादी केन्द्रको नेतृत्व भने ‘अपरिवर्तनीय’ जस्तै बनेको छ । पार्टी स्थापना भएदेखि नै अर्थात् ३० वर्षदेखि एकोहोरो एउटै व्यक्तिले नेतृत्व गरिरहँदा माओवादी नै जाम भएजस्तो भइसकेको छ । अर्थात्, माओवादी निरन्तर ओरालो–यात्रामा छ ।
पुष्पकमल दाहाल ‘प्रचण्ड’को नेतृत्वप्रति पार्टीभित्रै असन्तुष्टि चुलिँदो छ । त्यसैले अहिले माओवादी केन्द्रका उपमहासचिव जनार्दन शर्मा (प्रभाकर) ले प्रचण्डलाई नेतृत्व हस्तान्तरण गर्न सुझाव दिएका छन् ।
शर्माले अध्यक्ष प्रचण्डसहितका पदाधिकारीहरु संरक्षकको भूमिकामा रहने र तेस्रो पुस्ताको युवालाई नेतृत्व हस्तान्तरण गर्नुपर्ने प्रस्तावसमेत गरेका छन् । यसका लागि हालको केन्द्रीय कमिटी भंग गरी अध्यक्ष प्रचण्डको संयोजकत्वमा महाधिवेशन आयोजक समिति बनाउने र प्रत्यक्ष निर्वाचनबाट नयाँ नेतृत्व चयन गर्नुपर्ने शर्माको भनाइ छ । स्थायी कमिटी बैठकमा शर्माले राखेको यो प्रस्तावबाट अध्यक्ष प्रचण्ड नराम्ररी झस्किएका छन् । किनकि, उनीमा अझै पार्टीको नेतृत्व गरिरहने लालसा छ ।
माओवादी केन्द्रमा सामूहिक नेतृत्वको अवधारणालाई संकुचित गर्दै एकलौटी नेतृत्वको अभ्यास गरिएको उपमहासचिव शर्माको ठहर छ । शान्ति सम्झौतासँगै बदलिएको परिस्थितिअनुरूप पार्टीलाई संगठनात्मक संरचना र विधि पद्दति अनुसार चलाउनुपर्ने उनको भनाइ छ । त्यस्तै पार्टीमा बिग्रेको कामको नैतिक जिम्मेवारी नेतृत्वले नलिने प्रवृत्ति हाबी भएकोमा पनि उनले चिन्ता व्यक्त गरेका छन् ।
शर्माले माओवादी केन्द्रले उठाएको समाजवादको नारामा पनि प्रश्न उठाएका छन् । त्यस्तै पार्टीमा परिवारवाद हामी भएको भन्दै शर्माले प्रचण्डको कटु आलोचना गरेका छन् ।
