काठमाडौं । पछिल्लो समय धरानमा खानेपानी महसुलको विषयमा बढेको विवादले उग्ररुप लिँदै गएको छ । कुनैबेला जनश्रमदानबाट धरानमा पानी ल्याएको भनेर ‘हाइहाइ’ भएका धरानका मेयर हर्क साम्पाङसमेत अहिले खानेपानी महसुल विवादकै कारण निकै आलोचित भइरहेका छन् ।
यतिसम्म कि, खानेपानीको मुद्दाकै कारण चुनाव जितेका र लोकप्रिय भएका मेयर साम्पाङविरुद्ध अहिले धरानबासी नै आन्दोलनमा उत्रिएका छन् । आन्दोलनका क्रममा हिजो धरान दिनभर अशान्त रह्यो । प्रहरी र प्रदर्शनकारीबीच घम्साघम्सी भयो । एक प्रहरीसहित तीनजना घाइते भए ।
यसरी उग्र आन्दोलन भइरहेको धरानको खानेपानी महसुल विवादको चुरो के हो त ? धेरैको चासो विषय छ ।
खासमा धरानमा खानेपानी तथा सरसफाइ सेवा महसुल निर्धारण आयोगले दिएको परामर्श बमोमिज खानेपानी व्यवस्थापन बोर्डले मूल्य निर्धारण नगरेपछि स्थानीय आक्रोशित भएका हुन् । उनीहरुले खानेपानीको पुरानै महसुल दर कायम नभएसम्म आन्दोलन गरिरहने बताउँदै आएका छन् । हुन पनि धरानमा अत्याधिक मात्रामा खानेपानी महसुल बढाइएको छ । यहाँ नयाँ धारा जडान गनर्कका लागि खानेपानी बोर्डले ५ हजार रुपैयाँ बढाएको छ ।
अर्थात् पहिला १५ हजार रुपैयाँ लाग्ने ठाउँमा अहिले २० हजार र २० रुपैयाँ लाग्ने ठाउँमा २५ हजार रुपैयाँ पुर्याइएको छ । त्यस्तै यसअघि १० हजार रुपैयाँ तिर्नुपर्ने ठाउँमा ५० हजार रुपैयाँसम्म पुर्याइएको छ । यसरी मनलाग्दी महसुल बढाएपछि स्थानीय आन्दोलित भएका हुन् । मेयर साम्पाङले भने ऋणभार बढेकाले खानेपानीको शुल्क बढाउनु आफूहरुको बाध्यता भएको बताएका छन् ।
