सार्वजनिक यातायातमा रास्वपाका नेता: नौटंकी कि जिम्मेवारीबोध ?

काठमाडौं । जनताले भोग्नुपरेको सास्ती बुझ्नका लागि भन्दै राष्ट्रिय स्वतन्त्र पार्टीले आफ्ना नेताहरुलाई पाँच दिनसम्म सार्वजनिक यातायात चढ्न उर्दी जारी गरेको छ । र, त्यसैअनुसार आइतबार रास्वपाका नेताहरु करोडौंको निजी सवारीसाधन निवासमै थन्क्याएर सार्वजनिक यातायातमा सवार भए ।

खासगरी जनताको समस्या बुझेर संसदमा आवाज उठाउनका लागि भन्दै उनीहरुले सार्वजनिक सवारीसाधनको यात्रा गर्ने योजना बनाएका हुन् । तर, उनीहरुको यो कदमलाई धेरैले फण्डाका रुपमा बुझेका छन् । कतिपयले रास्वपालाई ‘सरकारमा हुँदा केही काम नगर्ने तर प्रतिपक्षमा गएपछि नौटंकी गर्न खप्पिस’ भनेर पनि टिप्पणी गरिरहेका छन् ।

सार्वजनिक यातायात सुधारका लागि आवश्यक नीति बनाउन पहिला समस्याको पहिचान गर्नुपर्ने भन्दै रास्वपा नेताहरूले यो अभियान चलाएका हुन् । सार्वजनिक यातायातमा नागरिकले भोग्नुपरेको समस्या र त्यसको सुधारका लागि रास्वपाले संसदमा सार्वजनिक महत्वको प्रस्ताव दर्ता गर्ने तयारी गरेको छ ।