बलात्कार मुद्दाका कैदी अस्पतालबाट फरार !

काठमाडौं । कारागारबाट उपचारका लागि अस्पताल लगिएका एक कैदी फरार भएका छन् ।

जिल्ला कारागार मोरङमा कैद सजाय भुक्तान गरिरहेका २४ वर्षीय आर्यन मोहमद अहमद खान भनिने मोहमद अहमद कोशी अस्पतालबाट फरार भएका हुन् ।

पेट दुख्ने समस्याका कारण बिरामी परेका अहमदलाई उपचारका लागि कोशी अस्पतालमा भर्ना गरिएको थियो । बिहीबार बिहान सवा ५ बजेतिर उनी अस्पतालबाटै फरार भएका हुन् । शाौचालय जाने क्रममा अस्पताल निगरानीमा खटाइएका प्रहरीलाई धकेलेर लडाउँदै उनी फरार भएको प्रहरीले जनाएको छ ।

विराटनगर महानगरपालिका–८ घर भएका अहमद जबरजस्ती करणी मुद्दामा दोषी ठहर भएका कैदी हुन् । भारततर्फ भाग्नसक्ने सम्भावनालाई मध्यनजर गरेर प्रहरीले नेपाल–भारत सीमा क्षेत्रमा निगरानी बढाएको छ ।

उनलाई जबरजस्ती करणी मुद्दामा जिल्ला अदालत मोरङले २०७९ साल फागुन २९ गते १२ वर्ष कैद र ५ लाख जरिवानाको फैसला गरेको थियो ।