काठमाडौं । तपाईंलाई सुन्दा अचम्म लाग्न सक्छ, सुनसरीमा एक पुरुषले प्रेमिकासँगको सम्बन्धमा खटपट आएपछि प्रेमिकाकी बहिनीकी छोरीको अपहरण गरेको खुलेको छ । सुनसरीको दुहवी नगरपालिका–६ का ५० वर्षे सञ्जय पासवानले एक युवतीसँगको प्रेम सम्बन्धमा खटपट आएपछि प्रेमिकाकी बहिनीकी ६ वर्षीया छोरीलाई अपहरण गरेको खुलेको हो ।
बालिका अपहरण गरेको आरोपमा प्रहरीले सञ्जयसहित उनका दुईजना सहयोगीलाई पक्राउ गरेको छ । अपहरण आरोपमा प्रहरीले सञ्जयसहित कलानन्द पासवान र सरिता पासवानलाई पक्राउ गरेको हो ।
अपहरणमा परेकी बालिका र सञ्जय आफन्त पर्दछन् । दुहवी नगरपालिका–१० डुम्राहाबाट मंगलबार दिउँसो ३ बजे आफ्नै मामाघरको आँगनमा खेलिरहेको अवस्थामा सञ्जयले बालिकालाई अपहरण गरेको प्रहरीले जनाएको छ ।
घरबाट अपहरण गरेर सञ्जयले बालिकालाई विराटनगर–१० मानव सेवा आश्रम अगाडि डेरामा लगेर राखेका थिए । प्रहरीले सोही डेराबाट बन्धक बनाएर राखिएको अवस्थामा बालिकालाई उद्धार गरेको हो ।
बालिकाकी ठूलीआमासँग सञ्जयको प्रेम सम्बन्ध भएको प्रहरीको अनुसन्धानबाट खुलेको छ । उनीहरूबीच खटपट भएपछि ती युवती सञ्जयसँग सम्पर्कविहीन भएर विदेश जाने भन्दै काठमाडौं गएकी थिइन् ।
पक्राउ परेका सञ्जय विवाहित हुन् ।
