काठमाडौं । नदी अतिक्रमण गरेर अनेक संरचना बनाएको परिणामस्वरुप काठमाडौं डुबानमा परेको छ । गएराति एकाध घण्टा दर्के झरी पर्न नपाउँदै काठमाडौंका विभिन्न ठाउँ डुबानमा परेको हो ।
वर्षापछि आएको बाढीका कारण काठमाडौंका खोला तथा नदी किनारका सडक ठाउँ–ठाउँमा अवरुद्ध भएका छन् । सडक नै बाढीले ढाक्दा यातायात आवागमन प्रभावित भएको छ । कागेश्वरी मनोहरा क्षेत्रको करिडोरका सडकमा अहिले पनि पानी जमेको छ । कागेश्वरी मनोहरा क्षेत्रको करिडोर पनि जलमग्न छ ।
नदी तथा खोला किनारका बस्तीमा बाढी पस्दा स्थानीयको दैनिकी नै प्रभावित भएको छ । च्यासलस्थित एमाले केन्द्रीय कार्यालय, शंखपार्क, सुकुम्बासी बस्ती, कालिमाटी तरकारी बजार क्षेत्र लगायतका स्थानमा जलमग्न भएका छन् । करिडोर क्षेत्रमा सवारी आवागमन प्रभावित हुँदा सवारी चालक र यात्रुहरुलाई जाममा बस्नुपर्ने बाध्यता छ ।
रातभरको वर्षाले भक्तपुरको हनुमन्ते र आसपासका सहायक खोला उर्लिँदा आसपासका अस्पताल, विद्यालय, बस्ती, उद्योग, कलकारखाना जलमग्नमात्र भएका छैनन् त्यहाँ लाखौँको क्षति भएको छ ।
